Extrait du registre du compte municipal de la ville de Tours 
, pour l'année 1479-1480, tenu par le receveur Jean Blondelet, sous la mairie de Jean de Coutance, faisant état de la décision prise par l'assemblée du corps de ville de Tours de donner à Jean Proust, boucher, la somme de 10 l.t. pour le rembourser de son déménagement vers Arras , où il exerce désormais à la suite de sa nomination par la ville de Tours dans le cadre du repeuplement de la ville sur ordre de Louis XI.
[f° 80] A Jehan Proust, marchant, naguere boucher de la boucherie de Chateauneuf de ladite ville de Tours , la somme de dix livres tournoys pour laquelle somme en l'assamblee des gens de la ville, faicte en l'ostel d'icelle ville le XXe jour de mars l'an de cedit compte, en laquelle estoient assemblez pour aucuns affaires d'icelle, sire Loys de La Meziere, maistre d'ostel du roy notre sire, sire Jehan Ruzé, Jehan Gallocheau, maistres Jehan Sainctier, Estienne Binet, Jehan Papin, Jehan Debray, Jehan Lampereur, Martin Marquet, Jehan Dufour, Macé Testu, Thibault Bidault, Pierre Barrault, Pierre Mousnier, Pasquier Surdeau, Jehan Larive, Jean Chevalier, Jehan Herpin, Pierre Fame, Jehan de Fougerays, Anthoine Charlot, Jehan Testu, Jehan Quartier, Pierre Berthelot, et plusieurs autres, et eust fait requeste aux habitans dessusdits nommez, disant que pour l'ung des bouchiers de ladite boucherie fut esleu pour ung mesnagier pour les bouchiers de ladite boucherie a aller demourer en la ville d'Arras appellee Franchise a laquelle eslection il a voulontiers obbey ainsi que le roy notre sire le manda et voulut et ordonna, et en obbeissant estoit le premier party de la ville de Tours , et avoit mené a femme et enffens. Pourquoy faire il avoit eu une charrete qui luy avoit cousté grant somme de denier et que depuis les autres [f° 80 v°] mesnagiers avoient eu charroy aux despens de ladite ville de Tours , requerant ledit Proust que le plaisir desdits habitans fut de lui paier son charroy au pris que avoient esté les autres qui depuis y avoient esté nomez. Sur laquelle requeste apres ce que les lettres de maistre Guillaume Choisy, commissaire audit lieu de Franchise, avecques la requeste a lui baillee audit lieu de Franchise par les habitans envoiez de ladite ville de Tours , ont esté veues et leues en ladite assemblee et lesquelles ledit Choisy a envoyees tant pour ledit Proust que autres, fut conclud et deliberé par les dessus nommez que audit Jehan Proust et pour lui ayder a supporter les fraiz et despenses d'avoir conduit et mené sa femme, enffens et mesnage jusques audit lieu de Franchise par charroy a ses despens, lui seroit baillé des deniers communs de ladite ville de Tours , par maniere de don pour ceste foiz ladite somme de X livres, laquelle somme, ledit receveur en ensuivant ladite deliberacion, ledit receveur a paiee et baillee audit Jehan Proust par mendement desdits maire, esleuz et commis sur ce, donné ledit XXe jour de mars l'an de ce compte cy-rendu avecques la quictance dudit Jehan Proust, pour cecyX l. t.
