De par le roy.
Chers et bien amez, sachans le grant bruict de guerre qui peult courir par tout notre royaulme et desirans le repos et transquilité de corps et d'esperit de tous noz bons et loyaulx subgectz, nous vous avons bien voulu advertyr du bon grant ordre et provision que nous avons donné en toutes les frontieres, entrees et passages de notre royaume qui est telle que quelques grans preparatifs qu'ayent peu dresser noz ennemys pour l'execucion de leurs malignes et dampnees entreprinses, ils n'en pevent raporter que honte, vitupere et dommage. Ce neantmoins, nous en faisant office de bon prince, et pasteur ne nous contentons pas seullement d'avoir pourveu lesdites limites, et frontieres de notre royaume, mais desirans cordiallement que le dedans soit preservé de toute moleste et oppression, et que nosdits bons et loyaulx subgetz puissent en vraye seureté et repos, vivre et negocier entre eulx, en leurs vaccancions et mesnages, aussi bien en temps de guerre que de paix, nous voullons et vous pryons, tres acertes que vous regardez aux fossez, murs, portaulx, boulevars et autres fortifications de notre bonne ville et cité de Bourges , les reduisans par voz diligences, soing et labeur en tel estat que vous ne puissiez craindre les vaccabonds, pillards, volleurs ne quelconque autre maniere de gens qui pourroient vous faire force ou invasion et hostilité, vous pourvoyant [...] de bastons, harnoys, artil[lerie] et toutes armes qui pevent servir a la deffence de ladite ville et ce [...] gracieuse remonstrance, cottisation et ordonnance que vous en scaurez [...] tant en general que particulier, partout et ainsi que besoing en sera [...] fiance et certitude que nous avons de voz obeissances et bonnes volun[tes]. Donné a Lyon , le XIIIIe jour de juillet, M V^c trente six.

[Signé :] FRANCOYS

Breton.

Bourges