De par le roy.
Chers et bien amez, nous avons receu les lectres que par ce porteur nous avez escriptes, ensemble celles que nostre frere et cousin le duc d'Orléans escripvoit a vous et a plusieurs autres. Et par vosdites lectres avons veu que vous avez arresté et detenez le porteur des lectres de nostredit frere et cousin, dont vous savons très bon gré et vous en mercyons. Et pour ce que comme ja vous avons escript le contenu des lectres de nostredit frere et cousin sont toutes choses controuvees et non véritables pour parvenir a leurs fins contre nostre auctorité, a la très grant foulle et destruction de nostre peuple, et que voulons bien y pourveoir ainsi qu'il appartient, nous vous mandons et enjoingnons expressement que le porteur des lectres de nostredit frere et cousin vous envoiez et faictes amener soubz bonne et seure garde en la conciergerie de nostre palais a Paris , pour illec en estre fait et ordonné ainsi que par raison et justice faire se devra. Et quant doresnavant nostredit frere et cousin, ou autres ses adherans et aliez vous escripvent ou mandent aucune chose, vous n'y adherez ne adjoustez foy en quelque maniere que ce soit, mais arrestez et detenez prisonniers les porteurs desdites lectres, messagiers et autres de ladite aliance, et de tout nous advertissez bien au long et en dilligence. Et en continuant tousjours la grande et bonne loyaulté que avez eue et devez avoir envers nous et la couronne de France , nous vous prions derechef que vous y perseverez de bien en mieulx et comme noz bons et loyaulx subgectz vous y emploiez et nous y servez, ainsi que en vous en avons parfaicte fiance. Et qu'il n'y ait point de faulte. Donné a Paris , le III^e jour de janvier [1485- 1488⁽¹⁾].

[Signé] CHARLES.

Parent⁽²⁾.

Bourges

(1) Des lettres très proches sont adressées à la même date aux habitants de Châlons (Lettres de Charles VIII..., t. I, p. 65-66). — (2)Pierre Parent, notaire et secrétaire du roi, mentionné depuis 1471, également changeur du trésor à cette date.