Lettre close de Charles VIII adressée aux bourgeois et habitants de la ville de Bourges 
, leur annonçant l'envoie de son chambellan, le seigneur de Baugy , à la suite du départ du duc d'Orléans pour le duché de Bretagne .
De par le roy.
Tres chers et bien amez, nous escripvons a nostre amé et feal conseiller et chambellan le seigneur de Baugy(1) que, pour les nouvelles qui nous sont seurvenues, a cause de ce que nostre frere d'Orleans s'en est allé en Bretaigne , ainsi que par noz autres lettres vous avons escript, il se tire en nostre ville de Bourges pour pourveoir tant en noz affaires que es vostres et autres choses qui pourront survenir et nous toucheront. Si vous prions, sur tout le service que nous desirez faire, que a nostredit conseiller vous obeyssez et faictes ce qu'il vous dira de par nous comme pour nostre propre personne, en vous retirant devers lui, soit pour nosdites affaires ou ceulx de nostredite ville touteffois qu'il vous mandera et que besoing sera. Et au surplus vous emploiez pour nous et nosdites affaires ainsi que tousjours avez fait, et que en vous nous avons nostre parfaicte et entiere confidance. Donné a Amboyse , le XVIIe jour de janvier [1487(2)].
[Signé :] CHARLES.
Parent.
[Au dos] A nos tres chers et bien amez les bourgois manans et habitans de nostre ville de Bourges
.Notes :
(1) Commune de Baugy , dép. du Cher , arr. de Bourges . — (2) Lettre datée d'après celle du 14 janvier 1487 sur le meme sujet adressée par le roi à la ville de Bourges .
