De par le roy.
Chers et bien amez, nous avons esté advertiz que ung nommé Jehan Bureau, concierge et clerc des mises, reparacions et affaires de nostre ville de Bourges , est fort maladif et que a present il ne pourroit excercer sondit office. Et pour ce que desirons nostre cher et bien amé Denis Morin, habitant de ladite ville, en estre pourveu après le decez d'icelluy Bureau, en faveur d'aucuns noz especiaulx serviteurs qui pour lui nous ont requis, a ceste cause et aussi qu'il est homme pour bien excercer ledit office, nous vous prions bien acertes que apres le trespas dudit Bureau vueillez pourveoir icelluy Morin dudit office et des a present luy en octroyer telles lettres que verrez estre a faire. Et si voyez que bien soit et que ledit Bureau ne peust excercer ledit office, y commectre ledit Morin en reservant toutesvoyes les gaiges et droiz d'icelluy office audit Bureau pour en joir sa vie durant ainsi qu'il avoit acoustumé. Si le vueillez faire et vous nous ferez agreable service. Donné a Molins , le VIII^e jour de septembre.

[Signé : ] CHARLES.

Bohier⁽²⁾.

Bourges

(1) Jehan Bureau, concierge, garde et clerc des oeuvres de la ville de Bourges dès 1488 (Bourges, Archives communales, CC 258). Il meurt en 1499 et est remplacé par Guillaume Prenat (id., CC 270). — (2) Plusieurs membres de la famille Bohier sont notaires et secrétaires du roi. Leur signature ne permet pas toujours de les identifier. Il s'agit ici certainement de Thomas Bohier, un des principaux signataires de Charles VIII, général des finances de Normandie à partir de 1493.