Monsieur le receveur, la presente sera pour vous faire entré comme madame de Saint-Pol, ma maistresse, a esté a Raynes⁽¹⁾ ou ont esté faict les nopces de monseigneur Danguyen et de sa fille et n'y avons esté que quatre jours parce que le roy a eu nouvelle de la royne d'Angleterre qui luy a faict signiffier la guerre audit lieu de Raynes. Par quoi s'en est allé a Compiegne⁽²⁾ donner ordre a ses affaires, et madame avec madame sa fille et mondit seigneur Danguyen s'en sont revenuz en ceste ville et s'en vont en Normandye⁽³⁾. Par quoy, avant que partie dudit Raynes, ay remys voz lectres entre les mayns de Delaligne qu'il m'a promys y faire tout ce qu'il pourra. Monseigneur l'evesques de Reynes est allé audit Compiegne qu'il m'a promys ou cas que monseigneur Des Roches n'y feust, qu'il en parleroit au roy et qui les feroit depescher. Mon frere, son maistre d'hostel, m'a dit qu'il y fera tout ce qu'il pourra qui est tout ce que vous en puys mander. Me recommandant a votre grace, et priant Dieu vous donner la syenne. De Paris , ce III^e jour de juillet. je vous prie estre recommandé au seigneur Jacques Boissimon et autres noz seigneurs de par d'elle. [Signé] Votre serviteur et amy, Olivier Cauthereau.

[Au dos] Au sire Gregoire Le Boiteux, marchant et procureur de la communauté de Loches , a Loches .
A Loches . [Au dos, le long du rebord gauche] Lectre de Cauthereau.

(1) Rennes , dép. de l'Ille-et-Vilaine . — (2) Compiègne , dép. de l'Oise . — (3) Normandie .