De par le roy.
Tres chers et bien amez, nous vous avons puis nagueres escript et par les seigneurs de Montmorency ⁽¹⁾ et de Nanssay ⁽²⁾, cappitaine de nostre garde, et autres noz depputez fait amplement dire et declarer le desir que nous avons a ce que nostre amé et feal conseiller l'evesque d'Orleans ⁽³⁾ soit par vous postullé en vostre futur arcevesque pour le bien de nous et de la chose publicque de nostre royaume, utilité, repoz et soulaigement de vostre eglise. En quoy croyons fermement que actendu les causes sy justes et raisonnables de nostre requeste, vous ne ferez difficulté de nous gratiffier et complaire. Toutesfoys, afin que de plus en plus vous entendez que nous avons ceste matiere a cuer et qu'elle nous est de grande importance, nous avons bien voulu de rechef vous en escripre et mandons ausdits seigneurs de Montmorency , de Nanssay et autres noz depputez, vous en parler et requerir de par nous, vous priant tres affectueusement que vous nous vueillez octroyer ceste requeste et considerer l'estat et diposition de noz affaires et avoir plus de regart a nostre honneur, au bien de la chose publicque de tout nostre royaume et au repoz et utilité de vostre eglise, que a l'affection particuliere d'aucuns. En quoy faisant, oultre vostre devoir, vous nous ferez sy grant et sy agreable plaisir que a jamaiz nous en aurons souvenance pour le recongnoistre envers vous et vostre eglise, en general et particulier, ainsy que vous diront plus a plain nosdits depputez. Lesquelz vous croyrez comme nous mesmes. Donné a Bloys , le XXI^e jour d'avril.

[Signé : ] LOYS.

Robertet.

Bourges

(1) Guillaume de Montmorency, baron de Montmorency et seigneur d'Écouen , chambellan de Charles VIII, Louis XII puis François I^er (Cf. Dictionnaire de la noblesse, par La Chenaye-Desbois et Badier, 3^e éd., 1869, t. XIV, coll. 382). — (2) Gabriel de La Châtre, seigneur de Nançay , capitaine des gardes du corps du roi (comme son père avant lui dès 1479), capitaine de la Grosse Tour de Bourges depuis 1495 au moins, et prévôt de Bourges depuis 1506 (Bourges, Archives communales, CC 259 et 276, p. 44). Il sera également chambellan et maître d'hôtel de Louis XII, puis gouverneur des enfants de France et maître des cérémonies, avant de mourir en 1538. — (3) Christophe de Brillac, évêque d'Orléans depuis 1503, après avoir été archevêque d'Aix (Cf. Gallia christiana, t. I, col. 110-111).