Lettre close de Louis XII adressée au chapitre cathédral de Bourges annonçant aux chanoines la nomination d'André Forman, évêque de Murray (Écosse
), au siège archiépiscopal de Bourges
par provision pontificale, dont il reçu le pallium des mains d'Etienne Ponchet, évêque de Paris
, et ordonnant aux chanoines de le laisser jouir paisiblement de son archevêché.
De par le roy.
Chers et bien amez, nous ne nous povons assez esmerveiller du reffuz, dissimulacions et dilacion par vous faictes de obtemperer aux tres justes, honnestes et raisonnables requestes et remonstrances que plusieurs foiz vous avons par noz lettres faictes et par noz officiers et bons personnaiges a ce par nous depputez fait faire, a ce que eussiez a postuler en vostre arcevesque nostre tres cher et grant amy l'evesque de Morray(1), ambassadeur devers nous de nostre tres cher et tres amé frere, cousin et bon allyé le roy d'Escosse(2), ou de remectre tout le negoce a nostre Sainct Pere le pape et n'avons cause de nous louer ne contenter de vous, et pour ce que nostre Sainct Pere le pape a nostre requeste a pourveu dudit arcevesché ledit evesque de Morray, lequel en ensuivant ladite provision nous avons receu au serment de fidelité et par nostre amé et féal conseillier l'evesque de Paris(3) luy a esté baillé le pallyon, nous desirons qu'il demeure paisible dudit arcevesché et pour ce faire sommes deliberez luy tenir la main et faire tout ce qui sera requis. A ceste cause nous avons bien vollu vous en escripre et advertir vous priant et mandant que vous vueillez du tout remectre le negoce de ladite ellection ou postulacion a nostredit Sainct Pere et a ce que par Sa Saincteté en a esté fait a nostre requeste comme dit est en recevant ledit evesque de Morray en vostre arcevesque et vray pasteur et le laissant paisiblement joyr dudit arcevesché ainsi que les bulles et briefs de nostredit Sainct Pere a vous adressans est mandé et qu'il ne soyt besoing de plus vous en escripre, autrement soyez seurs que si vous luy mectez quelques brouilliz ou empeschement nous y pourverions en sorte que son droyt luy sera gardé et ne vous repputerons bons ne obeissans subgectz, veu le bon et grant service que ledit evesque de Morray nous a fait et a nostre royaume ainsi que vous diront plus amplement de par nous nostre amé et feal conseillier et chambellan le seigneur de Vaten(4), bailly de Berry , et noz amez et feaulx conseilliers messeigneurs Jehan Sallat(5), maistre des requestes ordinaire de nostre hostel, et maistre Rogier Barene nostre avocat en nostre court de Parlement, lesquelz vous croirez comme nous mesmes. Donné a Amyens
, le XIIIe jour de septembre.
[Signé : ] LOYS.
Robertet.
(1) André Forman, évêque de Murray (Écosse ). (2) Jacques IV d'Écosse
. (3) Étienne Ponchet. (4) Pierre Dupuy, seigneur de Vatan
(dép. Indre
), bailli de Berry
depuis 1506 (G. Dupont-Ferrier, Gallia regia, t. I, p. 379). — (5) Jean Salat fut lieutenant particulier du bailli de Berry
à Bourges
entre 1477 et 1479, avant de devenir lieutenant général (de 1492 à 1509). Il fut aussi maire de Bourges
en 196, 1504, 1511, et maître des requêtes au Parlement de Toulouse
après 1509 (voir G. Dupont Ferrier, Gallia regia, t. I, p. 381 ; Arch. dép. Cher, 8 G 965 ; H. Jongleux, Archives de la ville de Bourges antérieures à 1790, Bourges, liste des maires).
|