Chers et grans amys, pour ce que de tout nostre euer desirons la promotion et avancement en Saincte Eglise de nostre amé et feal cousin et conseiller Alof de Cleves⁽¹⁾, prothonotaire du Sainct Siege appostolicque et docteur en chacun droit, tant pour les vertuz, merité et litterature qui sont en sa personne que aussi pour la grant proximité de lignaige dont il nous actient, nous vous prions tant et si affectueusement que faire povons que en faveur et pour l'amour de nous, le veillez eslire et pourvoir de la premiere prebende qui vaquera en vostre eglise en laquelle plus que en nulle aultre le desirons estre promeu. Et de ce, nous faire sçavoir vostre vouloir par l'archeprebtre d'Aubusson , nommé maistre Henry Belestat, auquel avons donné charge vous prier de par nous ainssi le faire, et vous prions de rechief que de ceste nostre requeste ne nous veillez escondire, mais le veillez preferer devant tout aultre quant le cas y escherra, et vous nous ferez ung grant et singulier plaisir, lequel nous recongnoistrons envers vous et les affaires de vostre eglise, quant en aulcune chose nous vouldrez employer aydant nostre Seigneur, chers et grans amys, qui vous ayt en sa saincte garde. Escript [...]⁽²⁾.

[Signé : ] LOYS.

J. Cotereau.

Bourges

(1) Alof de Clèves est le neveu de Marie de Clèves, duchesse d'Orléans . — (2) La fin de la phrase manque.