Délibérations la communauté d'habitants de la ville de Tours 
, en présence de René Dreux, procureur du roi en Touraine , relatives aux couleurs des étoffes du dais royal fabriqué par Jean Fouquet, du don d'une nef d'argent à la reine et du patron de celle-ci par Gilbert Jehan, orfèvre du roi, et concernant aussi les différents mystères et échaffauds montés par la ville à l'occasion de la première entrée solennel de Louis XI et de la reine à Tours .
Le XXVe jour de septembre, l'an mil IIIIc LXI, en l'ostel de la ville, en la presence de Maistre Regné Dreux, procureur du roy nostre sire ou bailliage de Touraine , se sont assemblez :
Les esleuz de ladicte ville ;
Maistre Jehan Panim, chanoine de l’eglise de Tours , et soy representant pour les doien et chapictre de ladicte eglise ;
Maistre André Duheuf et Lois Le Roy chanoine de monseigneur Saint Martin, et soy representant pour les doien et chappictre de ladicte eglise ;
Jehan Ruzé, Pierre Brete, Maistre Jehan Bonnart, Jehan Bernard et Jehan Dupuiz, Geuffroy Travers, Martin De Argouges, Pierre Laillier, Jaquet Godeau, Guillaume Laillier, Jehan Galocheau, maistre Jehan Peslieu le jeune.
Pour deliberer sur ce qui s'nsuit :
Et premierement pour delilerer et aviser quel poesle on fera, et de quelle soye ou couleur et a quelle devise, pour porter sur le roy a sa venue, dont sur ce esté Jehan Fouquet, peintre, qui en a dit son advis.
Item, pour adviser quel don on fera a la royne et se on fera faire une nef comme derrierement fut mis en deliberacion, et de quel nombre d'argent, dont sur ce a esté fait ung patron a la devise d’icelle par Gilbert Jehan qui l’a aporté en ladicte assemblee.
Item, pour le fait des chafaulx et des misteres ou faintes qu'il fault faire a la venue du roy, d'aviser la maniere.
Sur quoy a esté deliberé que au regard dudit poesle, sera fait de blanc et roge bougran tafetas, et sera bleu, brodé d'un souleil ou meilleu, semé d'elles couronnes, et les franges pareillement faites d'or deluere, et pour en apprester [ou apporter] et marchander a Jehan Belin, brodeur, et autres, pour faire les deppendances d'icellui, ont esté esleuz et commis a ce faire maistre Jehan Bernard et Jehan Galocheau.
Item a esté deliberé qu'on fera don a la royne d'une belle neuf de L marcs d'argent doré et bien ouvree, et pour ce faire a esté envoié querir Gilbert Jehan, orfevre du roy, auquel a esté marchandé d'icelle faire desdiz L marcs d'argent, et pour ce faire doit avoir ung escu d'or pour la façon de chacun marc ouvré en icelle et dore, et icelle a promis faire en la meilleur façon et plus belle que se poura faire et dire, en argent, et par ce faisant la dorera a ses despens, dont ladicte ville fournira oultre ce d'or, dont de l’or il y mectra en sera creu a son serement.
Item, an regard des chafaulx et des misteres, seront trasez par Jehan Fouquet apres disner en l'ostel maistre Jehan Bernard, et pour les divisez seront prins a ce ledit Maistre Jehan Bernard, Jehan Ruzé, Pierre Laillier, maistre Jehan Peslieu et Jehan Garnier, et apres ce en feront leur raport a l'autre assemblee pour en deliberer.
