Le samedi III^e jour d'octobre, l’an mil IIII^c LXI, en l'ostel de la ville, en la presence de honnorable homme Pierre Godeau, lieutenant a Tours de monseigneur le bailli de Touraine , se sont assemblez :

Les esleuz de ladicte ville et le commis pour les gens d'egIise d'icelle ;

Maistre Pierre Le Roy, vicaire de monseigneur de Tours , et soy representant pour mondit seigneur de Tours ;

Ledit Maistre Pierre et Maistre Estienne Godeau, chanoines de l'eglise de Tours , et eulx representans pour les doyen et chapictre de ladicte eglise ;

Maistre André Dubeuf, chanoine de l'eglise monseigneur saint Martin de Tours , et soy representant pour les doien et chapictre de ladicte eglise mondit seigneur saint Martin ;

Jehan Ruzé, Pierre Brete, Maitre Jehan Bonnart, Geuffroy Travers, Pierre Laillier, et Jehan de Constances.

Pour aviser ensemble sur ce que on a raporté que la royne vient aujourd'ui en ceste dicte ville, et ne scet on celle vient par eaue ou par terre, mais comme on cuide vient par eaue a disner en ceste dicte ville et loger en l'ostel Pierre Berart, et pour ce que on ne scet ou elle descendra, et sur ce en soit advisé qu'il est a faire.

Item, pour ce que le peuple de ladicte ville ne fait que murmurer de ce que l'entree de ladicte ville a tousjours cours, veu que ladicte ville a de present autre revenu du grenier en lieu, et pour ce requierent les manans d'icelle qu'elle soit abatue et sur ce soit advisé qu'il en est bon a faire.

Sur quoy a esté deliberé que au regard de la venue de ladicte ville, toutes les gens notables, bourgeois et marchans yront au devant d'elle, tous a cheval, en toutes leurs bonnes robes, lui faire la reverence et l'acompeignez a la ville si elle vient par eaue ou par terre a ladicte ville ou aux Montilz. Et au regard du fait de ladicte entree, aura tousjours cours pour emploier aux mises et reparacions de ladicte ville qui sont grandes, et qu'il la laissera de lever et avoir entendu que le roy l'apliquera a luy, comme on dit.