De par le roy. Chers et bien amez, nous avons entendu que n'avez encores satisfaict ne envoyé en notre recepte generale de Bourges , la somme que vous avons dernierement faict demander pour survenyr a partie du payement des gens de guerre que nous avons de present en Picardie pour notre service, qui ne nous est occasion de contantement, actendu l'importance de nosdites affaires. A ceste cause, nous mandons et tres expressement enjoignons, par la presente, que incontinant icelle receu ou au plustard dedans la fin de ce present moys, vous ayez a fournir ladite somme en notredite recepte generale, aultrement sommes deliberés pour l'interest en quoy a faulte de ce nous pourrions encourir vous faire contraindre de nous en payer le double, partant gardez d'y faire faulte, car tel est notre plaisir. Donné a Sainct Germain en Laye , le XXV^e jour d'octobre 1557. Ainsy signé, Henry, et plus bas Hureault. Et sur la superscription est escript : A noz chers et bien amez les gouverneurs, eschevins, manans et habitants de notre bonne ville de Bourges .