Jehan Mehendin demourant a Chartres et Claudine sa femme, demourans a Chartres en la parroisse Sainct André, Jehan Esnault et Jehanne sa femme, aussi demourans audit Chartres en la parroisse Sainct Hylaire, icelles femmes souffisamment auctorisees de leursdits mariz quant a ce qui ensuyt, faire ratiffier et accorder, lesquelz vendent a tousioursmes a Macé Nature, demourant a Meraubry , parroisse de Billoncelles , acheteur, present etc, pour luy, ses hoirs etc, tout et tel droit, pars et porcions qui ausdites Jehanne et Claudine, seurs, pevent compecter et appartenir en tous et chacuns les heritaiges et possessions quelzconques assis audit lieu de Meraubry a elles venuz et escheuz par le deces et trespas de feue Georgete, en son vivant femme de Guillaume Le Roux, demourant a Sainct Martin de Billencelles ⁽¹⁾, C’est assavoir leurs pere et mere. C’est assavoir d’une maison, jardin, court et appartenances, assis audit lieu de Meraubry , juxte Laurens Gerard d’une part et d’un bout, et abutant d’autre bout aux Crestiens ; item d’une mine de terre, assise ou terrouer de Memor[…], juxte les hoirs feu Jehan Douart d’une part, et Loys de Mars d’autre part, abutant d’un bout a Raoulet Girard, et d’autre bout aux hoirs feu Michau Aumont. En la censive des religieulx abbé et couvent de Sainct Pere de Chartres , a telz cens et droiz seigneuriaulx comme etc. Vente faicte pour sept livres tournois, dont etc, quictant etc. Promectant et garantissant, obligeant, renoncant etc Presens a ce pour tesmoings Jehan Brebier et Robert Pousteau, demourans a Chartres .

^(a) Ledit acheteur ausdits vendeurs soixante dix solz tournois restans etc, pour ladite vendicion, dont etc, a payer a la Notre Dame en septembre prouchaine venant, non obstant etc. Obligeant, renoncant etc. Presens a ce lesdits tesmoings.

(a) Minute suivante dans le registre.
(1) Act. comm. de Billancelles , dép. Eure-et-Loir .