Jehan Bonnet, laboureur, de la parroisse de Luz , confessa soy estre baillé et alloué avecques sa femme et famille, du jourduy jusques a la saint Remi prochaine venant, et d’icelle saint Remi jusques a trois ans prochains apres venans et ensuivans, a Pierre Morin, laboureur, demourant a Fresnes, parroisse de Luz , qui l’a prins, alloué et acueilli avecques sesdites femme et famille, pour estre et demourer avecques ledit Morin et le servir, tant ledit Bonnet que sesdits femmes et enffans, en toutes choses licites et raisonnables, bien, duement et convenablement. Pendant et durant lequel temps ledit Morin promect, a promis et sera tenu de leur querir et administrer boire, menger, feu, giste, lit, hostel, et donner et bailler pour ses services et des services de sesdites femme et famille, en la fin dudit temps, la some de neuf livres tournois. Promectant de chacune partie etc, obligeant etc, renoncant etc.