Jehan Le Breton et Jehanne, sa femme, auctorisee etc, demourans au Grand Maindreville , parroisse de Fontenay sur Eure , confessent que en faisant le traicté de mariage d’entre Gilot Le Breton, leur filz, demourant audit lieu, et Thibaulde, fille de Jaquet Couldroy, iceulx Jehan Le Breton et Jehanne, sa femme, donnerent, cederent et transporterent a tousioursmes audit Gilot Le Breton, en maniere de succession, pour luy et ses ayans cause, troys mines de terre en deux pieces assises au terrouer de Sainct Martin en Val parroisse dudit Fontenay , l’une piece contenant ung septier et l’autre piece contenant une mine, juxte lesdits Jehan Le Breton et sa femme d’une part et d’autre. Pour quoy, du consentement dudit Gilot Le Breton, leur filz, et en lieu d’icelle mine de terre dessus declaree, a laquelle il, a ce present et consentant, a renoncé et renonce, iceulx Le Breton et sa femme ont baillé, cedé, delaissé et transporté, et par ces presentes baillent etc, a touzioursmes audit Gilot Le Breton, pour luy, ses hoirs etc, une mine de terre en labour prinse du long du champ en deux septiers de terre, juxte lesdits Jehan Le Breton et sa femme d’une part et d’autre, abutant d’un bout a la rue dudit lieu de Maindreville . En la censive des religieulx prieur et couvent de Sainct Martin en Val, a telz cens et droiz seigneuriaulx comme etc. Cestz don, cession et transport faiz pour et aux causes dessusdites et pour icelles. Et dont etc. Promectant non venir contre. Obligeant etc. Presens lesdits tesmoings.