Saichent tous presents et avenir que en la court du Roy notre sire a Tours endroit par devant nous personne establiz venerables et discretes personnes maistres Jaques Chambellain, archeprebtre et Pierre Curchet, chanoines de l’eglise de Tours comme commis quant ace ainsi qu’ilz disoient de venerables et discretz les doyen et chappictre de ladite eglise de Tours d’une part et Pierre Paillault, marchant apresent demourant en la paroisse de Saint Pierre du Boille dudit Tours d’autre part. Soubzmectant c’est assavoir lesditz Chambellain et Cruchet, lesditz doyen et chappictre de l’eglise de Tours et leurs suctesseurs avec le temporel de ladite eglise et ledit Papillault soy ses hoirs et tous ses biens meubles et immeubles presents et avenir a la jurisdiction cohercion povoir et ressort de ladite court quant au fait qui s’ensuit. Lesquelx esditz noms ont congneu et confesse en ladite court avoir fait et font entre eulx les baille prinse afferme actords et convenances qui sensuivent en la maniere cy apres declairee. Assavoir que lesditz Chambellain et Cruchet ont baille audit Pierre Papillault qui d’eulx ont a present a tiltre de ferme par ces presentes, la moitié par indivis d’une maison et ses appartenances situee et assise en ceste ville de Tours pres l’ospitau ou fief du sieur du peage, feage et commandise dudit Tours joignant d’une part a la maison ou pend pour enseigne la Teste Noire d’autre part au pavé de la Rue a aller de la porte du pont a la porte de l’ospitau. Item demy arpent de vigne ou environ situé et assis ou fief de Maremoustier pres le carroy de Colombiers en la paroisse de Saint-Oyan, pres dudit Maremoustier joignant d'un long aux vignes de la Fonquete d’autre aux vignes de messire Michel de la Forge prebtre et d’un bout au chemin de Bois-Ribert. Item ung quartier et demy de vigne ou environ assis en la clouzerie de Michel de Launay ou fief de Rochecorbon joignant de toutes pars aux vieilles vignes dudit Michel de Launay. Item plus et la somme de cinquante deux solz trois deniers tournois de rente fonciere enquoy que Gilbert du Molyn, Jehan Hoquart et autres donnent chacun an a cause de certains heritages qu’ilz tiennent a ladite rente et tout ainsi que lesdits Chambellain et Cruchet ont ce jourdui acquis icelles choses de François de Mee, marchant chappelier et Andrée sa femme par avant femme de feu Jehan Hucher demourant en ladite paroisse de Saint Pierre du Boille dudit Tours . Et ce dudit jourduy jusques a trois ans prochains venir pour le pris et la somme de quatre livres t. chacun an que ledit Pierre Papillault preneur a promis et promet bailler et paier par chacune desdites trois annees ausditz doyen et chappictre de Tours pour l’utillite, proufit et augmentacion de la bourse des anniversaires de leurdite eglise et la fondacion du Subvenite a constumé estre dit et celebré chacun an en l’eglise Saint Pierre Pullier de ceste ville de Tours le mercredi des Rogacions, pour feu monseigneur maistre Jehan d’Argouges, en son vivant archeprebtre de Tours , aux termes et festes de notre dame de mars et de Saint Michel chacun par moitié a chacun desditz termes XL s. t. le paiement de la premiere demye annee escheant a la notre dame de mars prochaine venir. Et lesdites choses heritaulx ainsi baillees et prinses audit tiltre de ferme ont lesditz Chamballain et Cruchet es noms et qualitez que dessus promis et promectent garantir, sauver et deffendre audit Papillault envers et a ses aians cause envers et contre tous ledit temps durant ou pour tel autre moindre temps que lesditz doyen et chappictre les tiendront en leurs mains au moyen de leurdit acquest. En paiant par icelui ledit Papillault et sesditz aians cause ladite somme de IIII l. t. ausditz doyen et chappictre de Tours aux termes et manieres que dessusditz. Et acquictant en oultre par icelui Papillault et ses aians cause les cens et rentes deuz sur et acause desdites dicelles choses affermees aux festes, jours, lieux et termes a constumez et de ce en garder et garantir lesditz doyen et chappictre de tous dommages et interestz. Et quant a tout ce que dessus est dit tenir et acomplir sans jamais faire ne venir encontre lesdites parties establissent chacune pour tant que lui touche et peult toucher ont obligé et obligent l’une a l’autre, c’est assavoir lesditz Chambellain et Cruchet, lesditz doyen et chappictre de l’eglise de Tours et leurs successeurs avec le temporel de ladite eglise et ledit Papillault soy ses hoirs et tous ses biens meubles et immeubles presents et avenir. Et ont renoncé et renoncent a toute excepcion, decepcion, a tous applegemens et contre-applegement et oppositions quelzconques. Et generalment a toutes et chacune les autres choses ace contraires. Ce fut fait audit Tours et jugé à tenir par le jugement de ladite court lesditz establiz presents et consantens. Et promestrent par les foy et serment de leurs corps de non jamais faire ne venir encontre. Et scelle a leur requeste du scel royal estably et dont lon use aux contratz en la ville, chastellenie et ressort de Tours en tesmoing de verite le XXVII^e jour d’octobre l’an mil cinq cens et neuf. [Signé] Jaloignes J.