Vente par François de Mee, marchand chapelier, et Andrée, sa femme, de Saint-Pierre-du-Boile, à Jaques Chambellain, archiprêtre, et Pierre Crucher, chanoine, tous deux doyens du chapitre de l'Eglise de Tours , de leur droit de propriété sur la moitié d'une maison située près de l'hôpital de Tours , de deux pièces de vigne situées aux fiefs de Marmoutier et de Rochecorbon , et une rente foncière annuelle de 52 s. 3 d.t. dont l'assignation n'est pas indiquée, pour 70 l.t., sans témoins mentionnés. [Acte rayé]



Saichent tous present et a venir que en la court du Roy notre sire a Tours endroit par devant nous personnes establyz Françoys de Mee, marchant chappelier, et Andrée, sa femme, de lui souffisament auctorisee en notre presence quant ace demourans en la paroisse de Saint Pierre du Boille dudit Tours . Soubzmectant eulx leurs hoirs avecques tous et chacuns leurs biens meubles et immeubles presents et avenir a la jurisdicion cohercion povoir et ressort de ladite court quant au fait qui s’ensuit, lesquelx ont cougneu et confessé en ladite court avoir vendu et transporté et par la teneur de ces presentes lettres, vendent et transportent, des apresent a toujoursmais, a heritage, a venerables et discretz les doyens et chappictre de l’eglise de Tours es personnes de venerables et discrectes personnes maistres Jaques Chambellain, archiprebtre, et Pierre Cruchet, chanoines de ladite eglise, ace présents stippullans et achetans comme quant ace ainsi qu’ilz disoient desditz doyen et chappictre de Tours pour eulx et leurs suctesseurs pour et a l’utillite, proufit et augmentacion de la bourse des anniversaires sacrés dicelle eglise de Tours et la fondacion du Subvenite, acoustumé estre dit et celebré chacun an en l’eglise Saint Pierre Pullier de ceste ville de Tours , le mercredi des Rogacions, pour feu monseigneur maistre Jehan d’Argouges en son vivant archeprebtre dudit Tours . Les choses heritaulx cy-apres declairees, c’est assavoir, la moitié par indivis d’une maison et de ses appartenances situee et assise en ceste ville, pres l’ospitau et ou fief de sieur du peaige, feage et commandise de Tours , joignant d’une part a la maison ou pend pour enseigne la Teste Noyre, et d’autre part, au pavé de la rue a aller de la porte du pont a la porte de l’ospitau. Item demy arpent de vigne ou environ situé et assis ou fief de Maremoustier, pres le carroy de Colombiers en la paroisse de Saint-Oyan pres dudit Maremoustier joignant d’un long aux vignes de la Fonquete d’autre aux vignes de messire Michel de la Forge, prebtre, et d’un bout au chemin de Bois-Ribert. Item ung quartier et demy de vigne ou environ assis en la clouzerie de Michel de Launay ou fief de Rochecorbon joignant de toutes pars aux veilles vignes dudit Michel de Launay. Item plus et la somme de cinquante deux solz trois deniers tournois de rente fonciere en quoy Gilbert du Molyn, Jehan Hoquart et autres donnent et sont tenuz paier chacun an ausditz vendeurs a cause de certains heritages qu’ilz tiennent a ladite rente dont lesditz vendeurs seront tenuz et promectent baillez ausditz acheteurs les lettres de baille dedans trois ans prochains venant. Lesquelles choses estoient et sont tant de l’acquest fait par feu Jehan Hucher, premier mary de ladite femme que du matrimoine d’elle. À avoir tenir, joyr, user, posseder et exploicter desditz venerables les doyens et chappictre de l’eglise de Tours acheteurs et de leurs suctesseurs pour et a l’utillite que dessus lesdites choses heritaulx ainsi a eulx vendues et transportees comme dit est o tout droit de saisine de possession de propriete de seigneurie et de domaine avecques tous et chacuns les droiz, noms, raisons, actions, peticions et demandes reelles personnelles mixtes et directes comme lesditz vendeurs et chacun d’eulx avoient avoir pouvoient et entendoient avoir esdites choses et pour raison dicelles et en faire doresenavant a toujoursmais toute leur plaine volunté hault et bas plainement et paisiblement par nom et tiltre de ceste presente vendicion. Laquelle a esté et est faicte pour le pris et somme de soixante dix livres tournois baillez, nombrez et paiez en court en notre presence par lesditz stippullans pour et des deniers desditz doyen et chappictre de l’eglise de Tours , acheteurs, ausditz vendeurs en grands blans de dix denier t. piece et dont duquel pris somme et vendicion dessusdite iceulx vendeurs se sont tenuz et tiennent acontens et bien paiez et en ont quicte et quictent lesditz acheteurs et leurs successeurs et lesdites choses heritaulx ainsi vendues ont lesditz establisseurs vendeurs promis et promectent garantir, sauver et deffendre ausditz doyen et chappictre de Tours acheteurs et a leursditz suctesseurs envers et contre tous et delivrer de tous empeschements quelzconques a toujoursmais. Nonobstant, etc. En paiant doresenavant chacun an par iceulx acheteurs et leursditz suctesseurs assavoir est pour ladite moitié de maison la moitié de LXXV s. de rente et pour lesdites vignes II s. VIII d. t. a qui ils appartiennnent aux termes et lieux acoustumez pour toutes charges et deues et augarentage dicelles choses vendues ont lesditz establiz vendeurs espacialement ypothequé et obligé, ypothequent et obligent par cesdites presentes envers lesdiz acheteurs six arpents et demy de terre labourable situez et assis en une piece en la paroisse de Chemillé avecques trois quartiers de pré es fiefz de La Marchiere et Fontenailles. Item deux arpens de terre ou envirion et une maison estant dedans situez ou bourg dudit Chemillé. Item ung arpent et demy de vigne ou environ seant à Rorte pres et joignant dudit Chemillé. Item deux septiers de froment de rente fonciere que ledit De Mee dit lui estre deuz audit lieu de Chemillé tant a tiltre suctessif que d’acquest le double ou copie des lettres desquelx acquestz ainsi faiz par icelui De Mee lesditz vendeurs promectent bailler ausditz acheteurs dedans lesditz trois ans prochains. Et generalment tous et chacun leurs autres biens meubles et immeubles presents et a venir sans ce que l’especialite et generalite puissent nuyre ou preiudicier l’une a l’autre. Et par cestedite vendicion faisant, lesdits venerables stipullans ont donné et donnent grace pour lesditz doyen et chappictre de Tours acheteurs ausditz vendeurs telle que touteffoiz et quantes que lesditz vendeurs ou l’un d’eulx leur rendront et paieront dedans trois ans prochains venant ladite somme de LXX l. t. et tous coustz et mises pource faiz en ce faisant ils receverront lesdites choses vendues et ce fait ceste vendicion demour. Et quant a tout ce que dessus est dit tenir et acomplir sans jamais faire ne venir encontre, lesditz establiz ont obligé et obligent eulx leurs hoirs avecques tous et chacuns leurs biens meubles et immeubles presents et a venir et ont renoncé et renoncent a toute excepcion decepcion de mal, de fraulde, de lezion, de circonvencion a tous applegemens contre-applegemens et oppositions quelzconques. Et generalment, a toutes et chacune les autres choses ace contraires mesmement ladite femme establie au beneffice du droit de velleyan et a tous autres droiz faiz et introduitz en la faveur des femmes sur ce par nous souffisament acertenee. Ce fut fait audit Tours et jugé a tenir par le jugement de ladite court lesditz establiz presents et consantens et promisdrent par les foy et serment de leurs corps pour ce baillerent corporelment en noz mains de non jamais faire ne venir encontre et scelle a leur requeste de scel royal estably et dont l’on use aux contractz en la ville, chastellenie et ressort de Tours en tesmoing de verite le XXVIIe jour d’octobre l’an mil cinq cens et neuf.
[Signé] Jaloignes J.





text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
https://renumar.univ-tours.fr/xtf/view?docId=tei/TIPO634045.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)