Lettre close de Charles VIII adressée aux maires et échevins de Tours 
demandant l’envoi d’armes et d’hommes à Craon .
De par le Roy
Tres chers et bien amez, nos cappitaines et chefz de guerre estans icy alentour de nous nous ont fait savoir qu’il leur est besoing avoir des lances, harcs, trousses, cordes d’arcs, brigandines, salades et des armuriers et brigandiniers. Et, pour ce que, en nostre ville de Tours , y en a comme savez bien largement, nous vous prions et mandons que incontinent, a la plus grant diligence que faire se pourra, vous fetes venir lesdits armuriers et brigandiniers, avecques des choses dessusdites, et qu’ilz tirent à Craon et qu’il n’y ait point de faulte, car ilz seront bien paiez de ce qu’ilz porteront et nous feront bien grant service et plaisir et vous aussi d’en faire faire diligence. Donné a Laval , le XIIe jour de may.
[Signé] Charles
[Signé] Parent
Presentees en l’ostel de la ville par Denis Boutin, chevaucheur du dit seigneur, le XVe jour de may, l’an mil IIIIc IIIIxx et sept.
[Suscription] A noz tres chers et bien amez les maire et eschevins de nostre ville de Tours .
