De par le Roy.
Chers et bien, amez, combien que, apres la victoire qu’il a pieu a Dieu nous donner on pays de Bretaigne, et les prinses des villes de Fougieres , de Dinan et de Saint-Malo , il nous estoit facille tirer plus avant et mectre le surplus dudict pays en nostre obeissance, toutesfoiz, pour ce que nostre intencion ne fut oncques de proceder a conqueste de pays ne aussi a vengence, mais seullement de rompre les mauvaises entreprinses fetes ondict pays de Bretaigne, contre nous et nostre royaume, et tenir nostredict royaume en seureté, nous, pour honneur et reverance de Dieu et a la priere et requeste de nostre tres cher et tres amé cousin le duc de Bretaigne, avons esté contens de faire et accorder bon traicté de paix a l’onneur, prouffit et seureté de nous et de nostredict royaume, et, pour ce qu’il est convenable faire publier icelle paix, voulons et vous mandons faire crier et publier que bonne, seure, vraye et perpetuelle paix, amytié, union et concorde est, et doresenavant sera a tousiours inviolablement, entre nous et nostredict cousin le duc de Bretaigne, noz hoirs, successeurs, pays et seigneuries et les siens, et, a cause de la brevieté du temps, ne vous avons peu envoier le double dudict traicté de paix, mais bientost le vous envoyerons. Donné au Mans , le IX^e jour de septembre.
[Signé] Charles
[Signé] Jamont

[Au dos] Presentees en l’ostel de la ville, le XVI^e jour de septembre l’an mil IIII^c IIII^xx et huit par Simon Poilleux, chevaucheur, et publiees ledict jour.

[Suscription] A noz chers et bien amez les gens d’eglise, officiers, nobles, bourgoys, manans et habitans de nostre ville de Tours .