Monsieur le Maire, je croy que vous avez bien entendu, avec tout le corps de la ville, le proces que le seigneur Fortin, contre tout droit et raison et iniquement et de mauvaise conscience, a contre moy et lequel proces il vous veut persuader et à tous messieurs les eschevins, soubz couleurs frivolles et raisons en l’air, que c’est pour le proffit et utilité du public; come si les rois et les corps de villes estoient tyrans pour oster le bien d’un particulier, non seulement particulier à moy, mais commun à tout le couvent de Saint Cosme , pour le bailler au premier venu qui s'armeroit de ce beau tiltre d’utilité publicque. Je ne fais point de doute qu’il ne veuille persuader à ceux qui le voudront croire que facilement il enrichira les fauxbourgs de Tours , comme les Gobelins ceux de Saint Marceau. Quand à moy, je n’en croy rien, pour ce que ie n’en voy rien et aussi que nullement il ne donne sa teinture et sa peine à ses voisins ains la vend bien cher, sinon quelquefois quelque vieux devanteau d’une bonne femme qu’il fera reteindre pour grand mercy, voila le proffit qu’il aporte au public et, devant qu’il se fust venu planter en mon fond et en ma terre, laquelle il n’a que par amphitheose, et que, de mauvaise foy, il veut dire sienne et de son propre, les draps ne laissoient pas d’estre communs en cette ville et le peuple vestu sans luy. Je vous suply, Monsieur, au premier iour vouloir faire entendre à Messieurs de la ville mes raisons, affin qu’ilz me donnent iour et heure pour montrer mes tiltres et enseignemens et cinq ou six arrests de la court de parlement pour la riviere de la Choisille, depuis trois, ou quatre et cinq cens ans, et nouvellement, depuis dix huit mois aux requestes, contre les bateliers, teinturiers et mesme fait que cestuy cy. Aussy ie feray paroistre à Messieurs, par deux contracts, come le lieu et terre ou le seigneur Fortin s’est venu planter et habituer sa maison, teintures et chaudrieres, sont du propre patrimoine de Saint Cosme baillez en amphitheose depuis soixante et dix ans et dont les vies ne sont encores faillies; et voyant ledit seigneur Fortin qu’il avoit mauvaise cause s’est tantost voulu armer de Messieurs le conte de Sanserre et seigneur de Loué, de Messieurs du chapitre Saint Martin et de vous autres, Messieurs de la ville, aux uns donnant entendre que la rivière estoit à eux, à cause du pont de La Motte, aux autres que la maison estoit en leur fié, aux autres que c’estoit pour le bien public, pensant les attirer par ces pointz là à frayer aux despens du prosscès et iouir du proffit de leur peine; mais la malice a esté incontinent descouverte, come elle vous serra facilement, apres avoir veu mes tiltres et enseignemens que ie vous montreré et à tous Messieurs de la ville, toute les fois et quantes qu’il vous plaira l’ordonner. Je suis bien marry, Monsieur, de vous ennuyer de si longue et fascheuse lettre, et, surce, ie mettray fin, supliant le Créateur vous donner tres heureuse et longue vie, apres m’estre humblement recommandé à toutes vos bonnes graces. De votre maison de Saint Cosme , ce XVII^e juillet 1568.

Vostre humble et affectioné voisin et serviteur,
[Signé] Ronsard.

[Suscription] A Messieurs le maire et les eschevins de cette ville de Tours .