De par le Roy Chers et bien ames, nous avons entendu, a nostre grand regret, les meschans et malheureux actes et la pernicieuse et dangereuse entreprinse que, par la temerité et insolence d’aucuns de nostre ville de Tours , ont esté faictes premierement a l’encontre des soldats que nous avons ordonnez tenir garnison en ladite ville pour vostre salut et deffence, et, apres, contre le sieur de la Chastre, nostre lieutenant general et representant nostre personne et le sieur de Sainct Martin, ayant charge de nous en ladite ville de la garde du pont d’icelle, s’estans tellement obliés de l’obeissance et debvoir dont ils sont tenuz envers nous, qu’ilz ont osé, sans vouloir recongnoistre ledit sieur de la Chastre ne son authorité, luy tirer coups de harquebuzes et, depuis, tué et massacré Sainct Martin et faict infinyes autres demonstracions de mespriz et contemnement de leur authorité et, par consequent, de la nostre, et, pour ce que c’est chose qui nous apporte si grand malcontentement qu’il n’est possible de plus, et que nous desirons faire congnoistre a tous noz subjectz combien telles entreprinses nous deplaisent et en faire si griefve et exemplaire punition qu’il en soit memoire a tousiours, nous voulons, vous mandons, commandons et tres expressement enjoignons que, vingt quatre heures apres la presente receue, vous ne failles de mectre entre les mains dudict sieur de la Chastre tant les auteurs de la sedition advenue que leurs fauteurs et adherans, pour leur faire faire et parfaire leur proces, et apres les punir de telle et si griefve pugnition que l’enormité et grandeur de leur peché le merite, et ce, sur peyne de nous en prendre a tout le corps de la ville, et pour ce n’y faictes faulte, car tel est nostre plaisir. Donné au chasteau de Boloigne, le XXIIII^me jour de juillet 1568.
[Signé] CHARLES.
[Signé] Fizes.

[Suscription] A nos chers et bien amez les maire, eschevins, manans et habitans de nostre ville de Tours .
[Au dos] Lettre du Roy receue par les mains de Monsieur de la Chastre, le XXVII^e de juillet 1568.