De par le Roy
Tres chers et bien amez, nous avons receu vos lestres du XXVI^s du mois passé par lesquelles, et a ce que nous a escrit nostre cher et bien amé cousin le conte de Secondigny, mareschal de France , et la remonstrance que nous ont faicte les depputez de vostre part, nous avons entendu le desir que vous avez pour beaucoup de considerations que le presche qui a esté, par nostre ecdit de paciffication des troubles, estably a Maillé soit transferé a Montdoubleau , ou autre tel lieu commode qui sera advisé; ce que nous ne feussions pas a cest heure a vous accorder, si nous l’eussions peu faire sans contrevenir a nostredit edit, lequel nous voullons garder et inviolablement entretenir; mais, d’aultant qu’il est besoing, avant que de riens innover en cela, en communiquer et resouldre avec nos chers et bien amez frere et cousin, les princes de Navarre et de Condé, nous avons escrit a nostredict cousin le conte de Secondigny que, lorsqu’il sera arrivé à La Rochelle , il vuide et accorde de cest article avec nosdits frere et cousin et face en sorte, s’il est possible, que, de leur consentement, il soit transferé audit lieu de Montdoubleau, comme il en avait esté par cy-devant parlé; surquoy, aiant entendu ce qui aura esté resolu et arresté, nous vous tirerons hors de la peyne ou vous estes a ceste occasion, vous asseurant que pour la bonne affection que nous promettons vous portez a nostre service, nous serons tousiours bien aise de vous donner toute la satisfaction et contentement que scauriez desirer, en chose juste et equitable. Donné a Villiers Costeretz , le X^e jour de decembre 1570.
[Signé] CHARLES.
[Signé] Pinart
(Claude) natif de Blois , sieur de Cramailly, 1^er baron de Valois, secrétaire d'Etat en cette année 1570⁽¹⁾.
[Suscription] A nos tres chers et bien amez les gens du clergé, maire et eschevins de nostre ville de Tours .

(1) Indication sous la signature qui ne semble pas être contemporaine de la lettre.