De par le Roy,
Chers et bien amez, le besoing que nous avons d’argent pour subvenir aux extremes despenses qu'il nous convient supporter pour la guerre, mesmes pour l’entretenement des grandes forces estrangeres que nous ferons entrer cest esté eu nostre royaume, pour empescher les pernicieux desseings de noz ennemys, nous faict essayer tous moyens pour en recouvrer, ayant pour cest effect exposé en vente tout ce qui se peult de nostre ancien domaine de Navarre et de ceste couronne; mais, d’aultant que l’argent qui en proviendra ne peult estre si prompt qu’il seroit requis pour le bien de nostre service, nous sommes contrainctz d’avoir recours a aultres moyens, mesme a espreuver en ceste occasion l’affection que noz bons subjectz ont a la conservation de cest estat, a leur repos et a nostre service, de laquelle saichant que vous ne ceddez a nulz autres, nous avons bien voulu vous escrire la presente pour vous tesmoigner le desir et besoin que nous avons que vous nous secouriez d’une bonne somme de deniers, a quoy nous vous exortons de procedder si liberallement que vous puissiez servir d’exemple a toutes les autres villes de nostre obeissance de faire le semblable, comme nous nous promettons qu’elles feront, vous asseurant bien que ne scauriez nous tesmoigner vostre bonne volonté en saison et occasion qui plus le requiere, pour le bien de ce royaume, ny dont nous vous puissions scavoir meilleur gré. Donné a Espernon, le XXII^e jour d’avril 1591.
[Signé] Henry
[Signé] Potier

[Suscription] Noz chers et bien amez les maire, eschevins et habitants de nostre ville de Tours .