Messieurs, j’ay receu vos lettres, et entendu par vos depputez ce qu’ilz avoient chargé de me dire de votre part. Je croys que vous avez tousjours peu remarquer la particuliere affection que j’ay eue en tout ce qui a deppendu de votre conservation, et l’honneur qu’il a pleu a Sa Majesté me faire de m’honnorer du gouvernement de ces provinces, m’y rendant d’aultant plus obligé, je suys desireux d’embrasser et prandre eu protection ce qui vous regarde plus que ce qui touchera mon particulier, comme j’espere bien, par les effectz, vous en randre une asseuree preuve. C’est ce qui m’avoyt occasionné, auparavant que le sieur de Vallancé fust venu de deça, de vous dispenser du secours de mes trouppes, es environs de vostre ville, que j’ay deust licentier, voyant que les ennemys se sont retirez de ceste province, et sur la resollution que j’ay prise de m’en aller a Tours dans peu de jours, ou je m’achemineray seullement avec mon train et sy peu de noblesse, que les habitans de vostredite ville n’en recepvront aucune incommodité; car je desire moy mesme estre conservateur de vos entiers privilleges. Je ressens vous estre beaulcoup obligé des soixante harquebusiers de la garnison de Tours que m’avez envoyez, qui s’en pourront retourner a leur commodité, estant les ennemys, comme ilz sont, retirez. Vous priant tres affectueusement, Messieurs, vous asseurer qu’en tout ce qui deppendra a jamais de moy et de mes moyens, vous y aurez la mesme puissance que
Votre tres affectionné et plus asseuré amy
Françoys de Bourbon
A Angers , le cinqme janvyer 1593.

[Suscription] A Messieurs les maire et eschevins de la ville de Tours .
[Au dos] Monseigneur le prince de Conty. Receue le XI^e janvier 1593.