Messieurs, le service du Roy et l’interezt particullier que vous auriez a nostre perte, qui nous est quasy comme infaillible s’il n’y est promptement remedié, me faict vous faire celle cy pour vous dire que monsieur de M[...] part demain de Nantes et s’en vient joindre son armee a Ingrande , qui est composee de six a sept mil hommes de pied, et d’environ mil chevaulx; il a quatre canons et deux coullevrines. Tous les advis que nous avons confirmés par messieurs de Racain et de Lestre sont qu’ilz viennent aux ponts-de-Sez⁽¹⁾, comme il y a grand apparence, veu le grand apprest qu’ilz ont faict par eau, quelque bruict qu’ilz facent courir d’aller a Sablay. Ledict Pont-de-Sez est de telle importance a la conservation de ceste ville, pour estre sa mere norrice, que je crains fort que les ennemis n’y facent quelque grand effect. Si ce n’est pour garder, ce sera pour ruiner et brusler les moullins, a quoy il nous est impossible de nous pouvoir opposer pour le peu de gens de guere quy nous sont restez apres le levement de siege de Rochefort, que nous avons retenus a force d’argent; c’est ce quy nous faict avoir recours a ceulx quy peuvent participer au mal qui nous tallonne, comme a vous aultres, Messieurs, pour vous supplier tres humblement nous voulloir assister a une si urgente necessité de tout ce que vous pourrez de voz garnisons ou des trouppes quy sont proches de vostre ville, et de les voulloir envoier avec le plus de dilligence qu’il se pourra, par eau ou autrement, afin de les jeter dans lesdits pontz de Sez ou la ou nous adviserons, pour empescher la course des ennemis. En ce faisant vous ferez ung signallé service a sa Majesté, obligerez beaucoup ceste ville et moy particullierement, Messieurs, quy vous en randray tres humble service partout ou il vous plaira m’honorer de voz commandementz. Attendant lesquels je prie dieu vous donner, Messieurs, en tres parfaicte santé, tres seure et tres longue vie.
Votre tres obeissant serviteur,
[Signé] Puchairic
Fait a Angers , ce XXVI^e jour de decembre 1593.

[Suscription] A Messieurs, Messieurs les maire et eschevins de la ville de Tours .

(1) Act. comm. des Ponts-de-Cé , dép. Maine-et-Loire .