En la présence de moy, notaire royal a Tours , et des tesmoings cy-apres nommez, maistre Jehan Juste, ymagier du roy, et Just de Anthoine Just(1), aussi ymagier, son nepveu, ont passé quictance l'un a l'autre. C'est assavoir que ledit Anthoine de Juste a eu a tenu et tient quicte ledit maistre Jehan Juste, son oncle, de toutes et chacunes les sommes de deniers en quoy ledit maistre Jehan Juste lui povoit estre tenu, tant de ses sommes et sallaires qu'il a servy de tout temps passé jusques a ce jour, que autrement. Et pareillement, ledit maistre Jehan Juste s'est tenu et tient pour contant et bien satisfaict de service que ledit Just Anthoine de Juste lui estoit tenu de faire. Et generalement, se quictent lesdictes parties l'un l'autre de toutes et chacunes les choses qu'ilz eurent jamais a besoigner ensemble en quelque maniere et pour quelzconques causes que ce soient, de tout temps passé jusques a ce jour. Et toutes obligacions et cedulles faictes de par avant ce jour advenues. Promectent pour raison de ce de non jamais eulx entre faire aucune question ou demande, ores ne pour l'avenir. En tesmoing de ce j'ay signé la presente a leur requeste de mon seing manuel cy mis le premier jour de juillet mil V^c vingt et ung, es presence de venerable personne maistre Philippes de Pressanville, prebtre-aumosnier de Noffle-le-Chasteau⁽²⁾, ou diocese de Chartres , et Robert Gervaise, tesmoings.
[Signé] Foussedouaire

(1) Il semble que Jacques Foussedoauire hésite entre Antoine Juste, frère de Jean Juste I^er, et Juste de Juste, fils d'Antoine et neveu de Jean, par conséquent, créant ainsi une confusion tout au long de la minute. — (2) Act. comm. de Neauphle-le-Château , dép. des Yvelines .