De par le roy.
Tres chers et bien amez, pour ce que le temps ne fait encores a propoz de mectre notre armee aux champs sur les frontieres de notre royaulme et pays de noz ennemys principallement pour la neccessité de vivres et fourraiges qu’il y a parquoy n’est pour le present besoing de faire marchez le gens de pié que vous avons fait demandez, mais seullement entretenir et souldayer ceulx qui sont aux garnisons et places, qui ne se peult faire sans nous aidez des deniers que vous bailleres pour la soulde desdits gens de pié, nous devez fournir et souldoyer si les voullons faire marcher et cela vous est tout ung et une mesme despence. A ceste cause [f° 73 v°] nous vous prions et mandons tres instamment et toutes difficultez, excuses et remonstrances cessans que le plus tost qu’il vous ser possible, vous faicte mectre et baillez es main du tresorier de l’extraordinaire de la guerre, Maistre Jehan Prevost, la somme de dix huit cens livres tournois, a quoy se monte un cartier dudit paiement et soulde des cent hommes de pié que vous avons fait requeriz et demandez. Et trouvez ladite somme soit par emprunt ou a la rendre cy apres des deniers des aides que vous leverez pour ledit paiement et soulde ou par assiete sur vous, ainsi que vous adviserez pour le mieulx et plus expedient en maniere que dedans le premier jour de may prouchain ladite somme soit baillee et delivree audit Prevost et ne fault pas qu’il y ait faulte autrement vous seriez cause que nosdits gens de guerre qui sont sur les frontieres et tiennent teste a noz ennemys pour les gardez d’entrez en notre royaulme et pillez noz subgectz, habandonneroient notre service et que nosdits ennemys entreroient, pilleroient et brulleroient le pays et ferroient des maulx innumerables dont n’aurions cause d’estre contans de vous et autres qui en auroies esté cause. Aussi en baillant ladite somme dedans ledit temps vous en nous pourries faire service plus agreable ne prouffitable pour nous et la chose publicque dont aurons toujours de tout plus vous et voz affaires en general et particullier en bonne et singulliere recommandation et de rechef vous prions n’y faire faulte car se sont parties arrestees dont nous avons fait fons et estat audit tresorier de l’extraordinnaire. Donné a Lion , le XXII^e jour d’avril, apres Pasques mil V^c XXII. Ainsi signé Françoys et Dorne. Et dessus : A noz tres chers et aymez les maire, eschevins, bourgeoys, manans et habitans de notre bonne ville et cité de Tours ⁽¹⁾.
[Signé] James Brahier⁽²⁾

(1) Lettre intégrée dans la délibération du 30 avril 1522. — (2) Secrétaire municipal de la ville de Tours pour les années 1521 et 1522.