De par Madame, regente en France
Tres chers et bien amez, pour commancez de mectre paix et repos en ce royaulme ainsi que toujours avons desiré et encores desirons, nous avecques l’ayde de Dieu avons tant fait que bonne paix a esté faicte, conclute et traictee par noz ambassadeurs estans en Angleterre avecques le roy dudit Angleterre , telle que nous esperons et tenons quelle sera de duree et quelle redondera au grant bien, prouffit et utillité, non seullement des deux royaulmes mais de toute la chretienté et avecques aidera grandement a la liberté et delivrance du roy notre tres cher seigneur et filz et pour ce que entre autres choses il est dit par le traicté de ladite paix que les principalles villes dudit royaulme bailleront leurs lectres en bonne forme, par lesquelles ilz promectront [f° 90 v°] entretenir et observez et faire entretenir et observer ce que nosdits ambassadeurs ont faict tracté promis et accordé selon et ainsi qu’il est contenu et accordé en la mynute et forme que vous envoyons cy dedans encloze. Nous vous prions et requerons tres chers et bien amez que incontinent et promptement vous veuillez faire ladite promesse et expedicion desdites lectres en maniere que nous les puissions envoyez a nosdits embassadeurs et en ce faisant entierement satisfaire adce que a esté par eulx promis et acordé. Autrement ladite paix seroit rompue et n’auroit aucun effet qui tourneroit au grant interetz et domaige de tout le royaulme comme vous l’entendez assez. Par quoy, vous n’y ferez point default, tres chers et bien amez notre Seigneur vous ait en sa saincte garde. Escript a Roussillon en Dauphiné , le XIIII^e jour de septembre. Ainsi signé : Loise et Robertet. Et dessus lesdites lectres missives est escript ce qui s’ensuit : A noz tres chers et bine amez les maire, eschevins, bourgeoys et habitans de Tours ⁽¹⁾.

(1) Lettres intégrées dans la délibération du 26 septembre 1525. Elle sont accompagnées des intentions et mémoires de la régente sur le sujet (f° 67 v° à f° 69 v°, latin) mais aussi par la demande du corps de ville aux religieux de faire des processions générales.
Elles sont accompagnées par une seconde lettre du 17 septembre 1525 (Tours, Archives municipales, BB reg. 18, f° 71 à f° 72).