Tres chers et bien amez, pour commancez de mectre paix et repos en ce royaulme ainsi que l’avons toujours desiré et encores desirons, nous avons avecques l’ayde de Dieu avons tant fait que bonne paix, amitié et alliance est faicte, conclute et traictee entre le roy notre tres cher seigneur et filz, son royaulme, pays, terres, seigneuries et subgectz d’une part et le roy d’Angleterre, son royaume, pays, [f° 71 v°] pays, terres, seigneuries et subgectz d’autre part, telle et si seure que nous la tenons estre de longue duree et qui redondera au grant bien, prouffit et utillité non seulement des deux royaulmes mais de toute la chretienté et avecques ce aidera grandement a la liberté et delivrance de notredit seigneur et filz, et pour ce qu’il est requis de tel et si grant bien faire publicacion et demonstrance generalle par tout le royaulme, nous vous envoyons cy dedans enclos la forme qui se doit faire de ladite publication. Et vous mandons et ordonnons en vertu du povoir et regence qu’il a pleu audit seigneur nous baillez et lessez en cedit royaume durant son absence, que icelle publication vous faictes faire a son de trompe et cry public par tous les lieulx ou vous avez acoustume de faire en maniere que nul n’en puisse pretendre cause d’ignorance, en rendant graces, louanges et mercy a notre Createur principal auteur d’icelle, de ce que luy a pleut commancez [f°72] par ceste paix a voulloir mectre unyon et repos en ladite chretienté tres chers et bien amez notre seigneur, vous ait en sa saincte garde. Escript a Condrieu , le XVII^e jour de septembre. Ainsi signé Loyse et Robetet.
Et dessus lesdites lectres est escript ce qui s’ensuit : A noz tres chers et bien amez les maires et eschevins, bourgeoys et habitans de la ville de Tours ⁽¹⁾.

(1) Cette lettre est liée à une précédente lettre en date du 14 septembre 1525 (Tours, Archives communales, BB 18, f° 70 à f° 71).