[fol. 45] Le XVI^e jour de juillet l'an mil V^c vingt et ung, en la court du roy nostre seigneur a Tours , etc. Personnellement establiz Robert Gouart, laveur et affineur d'or et d'argent demourant audit Tours , ou nom et comme procureur de Francoys Duboys, orfevre specialment depputé quant a ce, et d'une part. Et Colin Tagueau, de la paroisse de Saint Estienne de Chigné ⁽¹⁾, d'autre part. Soubzmectant, etc. Lesquels esdits noms de leur bon gré et volunté ont congneu et confessé en ladite court avoir fait et font entreulx les bail et prinse afferme, accords, convenances, promesses et obligacions qui s'ensuivent, en la maniere qui s'ensuit. C'est assavoir que ledit Robert Gouart a baillé et baille par ces presentes audit Taguereau a ce present, qui de luy a prins et prant audit tiltre de louage, de la feste de Saint Michel derniere passee prouchaine venant jusques a six a cinq ans prouchaine venant jusques a six ans prouchains venans consecutifs et enssuivans l'un l'autre, sans intervalle de temps. Tout tel droit, part [fol. 45, v°] et porcion de heritaiges que ledit Francoys Dubois a audit lieu de la du Port en la paroisse de Saint Estienne de Chigné , au lieu pres Port de la Pille⁽²⁾. C'est assavoir cinq quartiers de vigne ou environ assis audit lieu de La Bodiniere. Item, une maison ensemble quatre caves, leurs jardins et appartenances contenant de tenue demy arpent ou environ et ainsi que lesdites choses se comportent et que ledit Francoys Duboys, bailleur, en a joy par cy-devant a tiltre d'acquest fait de Martin Delestang, sans aucune chose en reserver ne retenir, sauf VII s. VI d.t. de rente et VI s.t. d'autre part qui sont dues a cause de La Bodiniere par Jehan Bodinet, la veufve feu Jehan Cartie Jullien Delatresche que ledit ba. Ensemble une cave de nouveau faicte audit lieu, etc. A avoir, tenir, etc. Par nom et tiltre de la baille et prinse aferme susdite. Laquelle a esté et est faicte pour le pris et somme de quatre livres dix solz de ferme par chacun an payables par les demyes annees et par esgalle porcion. C'est assavoir aux festes [fol. 46] de Nostre Dame de mars et Saint Michel, par moictié, premier terme de payement commencant a la Saint Michel Nostre Dame de mars prouchaine venant parce que ledit preneur prant ceste presente annee la cueillecte qui sera compté pour une desdites six annees. Et tous coustz, etc. Et au regard de la cueillecte de ceste presente ledit preneur la paiera audit bailleur a la Saint Michel prouchaine au pris que dessus desdites quatre livres dix solz t. Promectant ledit bailleur et oudit nom garentir, etc. Et en payant ladicte ferme. Et oultre les charges et devoirs seigneriaulx pour ce duz aux seigneurs, jours, lieux et termes acoustumez. Et d'iceulx rendre quicte et indempné ledit bailleur et les siens, aussi de entretenir en bonne et suffisant labeur et reparacion lesdites choses baillees ledit temps durant. Et a ce tenir, etc. Obligeant lesdites parties esdits noms et leurs hoirs. +
Renoncant, etc. Foy, etc. Presens honorables personnes Martin Delestang, maistre Jehan Juste, ymagier du roy, et Macé Thorgne, tesmoings etc.
+ Mestant et par especial ledit preneur au payement de ladite ferme ung quartier de vigne sis ou cloux de Champ-Cruchon, joignant d'un long a la vigne de Jehan Ballan, d'autre long a René Chesnier, d'un bout au chemin par lequel on va de Maupertuis au Pourceau, et d'aultre bout aux vignes de Jehan Perlin les Ballans.
[Signé] Foussedouaire

(1) Saint-Étienne-de-Chigny , dép. Indre-et-Loire . (2) Act. Cinq-Mars-la-Pile , dép. Indre-et-Loire .