De par le roy
Tres chers et bien amez, pour ce que nous avons esté advertiz de plusieurs abbuz qui se commectent par les appoticquaires de notre bonne ville de Tours , et des inconveniens qui par ce moien s’en ensuivent au grant domaige des habitans d’icelle et de tous autres qui ont besoin de leur service, a ceste cause desirons qu’il soit obvié et donné remedde a telz abbuz et inconveniens pour le bien de ladite ville, voullons vous mandons et expressement enjoignons que vueillez tenir assemblee et l’ostel deladite ville, appellez avecque vous noz officiers, ensemble tous les medecins praticquans et appoticquaires tenans bouticques en icelle, ou la plupart d’iceulx, et la soit par entre vous advisé la maniere en laquelle se pourra mectre bon ordre audite affaire d’appoticquaire, en mectant par articles les advis qui en seront par vous sur ce faiz, lesquelles apporterez devers nous ou devers notre amé et feal chancellier pour apres y estre donné l’ordre que verrons estre affaire et ny faires faulte car tel est notre plaisir. Donné au Plessis lez Tours, le VII^e jour de decembre. Ainsi signé : Françoys et audessoubz Robertet. Et dessus : A noz tres chers et bien amez les maire et eschevins de notre bonne ville de Tours .
[Signé] Ganiou pour coppie a l’original.