Le XXI^e jour de janvier l’an mil IIII^c IIII^xx XVIII, en la court du Roy notre sire a Tours , personne establye Jehanne, femme de Pierre Couldreau et de lui autres comme elle dist demourer en la paroisse de Saint Cyphorian oultre le pont de Tours . Soubzmettant etc laquelle a cougneu et confesse en ladite court avoir vendu et transporté et par la teneur de ces presentes lettres vend et transporte des a present a tousjourmais a heritage a Jehan Jaloignes, demourant audit Tours ace present et achetant pour lui et ses hoirs etc douze deniers tournois de rente annuelle et perpetuelle qu’elle a droit d’avoir et prandre chacun an le jour Saint Jehan Baptiste a cause de la succession de sa feue mere et autres ses parens decedez sur ung arpent de terre dont Jehan Galle est a present detenteur seant en la paroisse vivant d’Oé et Chanceaux ou fief de la Remetiere. Joignant d’un long et d’un bout aux terres dudit acheteur, d’autre long a la terre de Macé Colinet et d’autre bout [nom manquant]. A autre etc par nom et tiltre de ceste presente vendicion laquelle a esté et est faicte pour le pris et somme de quinze solz tournois paiez en court en notre presence par ledit acheteur a ladite establie et dont etc promectant garantir etc en paiant doresenevant chacun an par ledit acheteur et ses aians cause IIII deniers de cens deuz au sieur dudit fief le jour de Saint Pierre d’après ladite Saint Jehan Baptiste a cause dudit arpent de terre pour toutes charges et devoirs. Et oultre promet icelle establye faire consantir et obliger sondit mary a ceste presente vendicion des le jour de caresme prenant prochain venir. Et quant etc ladite establye a obligé et oblige elle ses hoirs etc renonçant etc mesmement au benefice du droit de Velleyan etc foy etc. Presens ledit Jehan Galle, Mery Bedacier et Bertran de Samen tesmoings etc.
[Signé] M. De Laval.