A Yvonnet Malion macon, la somme de vingt livres tournois en oultre la somme de quatre vings livres tournois que Pierre Briçonnet, receveur de l’annee dernierement passee de la dite ville, lui doit avoir paie pour le parpaiement^(a) de la somme de cent livres tournois qu’il devoit avoir par marché a luy jacpieca fait par les esleuz precedans pour faire deux angeloz de pierre dont l’un tendra les armes du Roy notre sire ou il aura une couronne sur l’escu, et l’autre angelot tendra les armes de mon seigneur le Regent le royaulme, et au dessoubz des dictes armes seront les armes de la dite ville. Item la pierre ou seront les dites armes aura deux piez et demy de long, une autre pierre du tablement par manière d’establie sur laquelle seront assises les dictes armes. Item deux autres pierres sur le bot^(b) aux deux costes des dictes armes. Item fera ung ymaige de nostre dame qui aura trois piez et demy de long, de la perriere de Saint Aignen . Et fait plusieurs autres choses contenues et declairees ou mandement des diz esleuz sur ce fait pour de paie[r] par mandement des dits esleuz cy rendu avecques quictance du dit Yvonnet. Donné le vingt deuxieme jour de fevrier l’an mil quatrecens vingt et ung⁽¹⁾, 20 £ tournois.

(a) Paiement intégral. — (b) Bout (?).
(1) 1422 (ns).