Monsieur, j’ay receu vos lettres par Chastre⁽¹⁾ qui a demouré plus que Monseigneur de La Forest⁽²⁾ ne vouloit et vous prie, puis que vous estes resolu d’envoier ma cousine Marie vostre fille a Poiessi de ne huser point de remise car cela fascheroit Monseigneur de La Forest et de moy. Je suis tres aysse que ma fille luy mene mais que se soiet bien tost pour ce qui faust et je le desire que madite fille s’an viene ; elle a des affaires de desa et aussi que je suis ceule. Au reste, Monseigneur de La Forest s’an va par dela. Je vous prie devent luy de ne luy parler de rien quy le puisse fascher ny faire aulcung regrés de vostre perte dont il porte asés d’ennuy. Il n’en dit mot. Au reste, Monsieur, je suis atandant le coré que si tost qui sera arivé nous aviseron a faire faire la serimoniee aveque tout l’ouneur qu’elle meritoit ; apres je aviseray aveque Monsieur Marechal⁽³⁾ pour vos affaires qui sont de desa qui sont asés difisiles. Ce que j’an saray, je vous en esclersiray tout a la verité, apres vous aviserés quy vous an voulés fier. Elle sont asés difisiles car il y a de petite ferme qui s’an vont an ruine qui faust vendre ; feu Madame⁽⁴⁾ l’avoit deliberé ; si Dieu heust voulu qu’elle fust venue issi vivente mais Dieu ne la voulu a mon grant regret. Je ne vous diray austre chosse sinon que je suis a vostre servise vous baisant bien humblement les mins, priant Dieu, Monsieur, vous donner en santé longue vie. De Bourge , ce XVe desanbre.

Vostre ben humble, hobeissante cousine a vous servir. M.V.

[Post-scriptum] Je vous prie de bien faire donner a se [pranquet] tout ce qui faust pour Castelnau⁽⁵⁾ ; autremant je vouldrois qui le lesast et aussy de ne le faire guiere sortir du colege, cela le debauche de ces etudes. Feu Madame luy anvoiet souvent du bois et tout ce qui luy estoit nesaicere. Escusés moy si je vous a escris, ce n’est que pour vous faire souvenir de Castelnau qui a coutume de jeunesse de n’avoir fauste de rien. Je say que l’aflicsion que vous avés de la mere vous peut faire oublier ; de moy j’en aray soing et de tous vos anfans tant que je vivré a jamais. A Dieu, Monsieur.

(1) Probablement Claude de La Chastre, maréchal de France, gouverneur du Berry. — (2) Jacques Bochetel, seigneur de Breulhamenon, maître d'hôtel du roi depuis 1563. Il n'est plus seigneur de La Forest Thaumier depuis 1560. — (3) Probablement François Le Mareschal. — (4) Marie Bochetel, fille de Jacques Bochetel, épouse de Michel de Castelnau, morte en décembre 1586. — (5) L'un des deux fils de Michel de Castelnau, Jacques, ou Edouard-Robert.