Fait coppie a ladite da.le Le dixiesme jour de juillet l’an mil V^c quarente troys en la court du roy nre. sire a Tours furent pns. en leurs personnes damoiselle Anne Le Clerc vefve de feu noble homme maitre Victor Brodeau en son vivant notaire et secretaire du roy notre sire, dame de La Chastiere et de La Remetiere, demourant en la paroisse Saint Pierre du Boille aud. Tours d’une part, et Jacquine du Moulin vefve de feu Colin Braquier et Jehan Braquier filz dud. deffunct et d’elle icell. deffunct lors qu’il vivoit led. Jehan laboureur et lad. veufve demourans en la paroisse Notre Dame aud. lieu de La Chastiere d’autre part, lesquelz deuement soubzmis etc. ont congneu et confessé avoir faict et par ces presentes font les bail a mestairie accords promesses et obligations qui s’en suyvent, C’est assavoir que lad. damoiselle Anne Leclerc a baillé et baille aud. tiltre de mestairie et a moictié de tous fruictz a lad. vefve Braquier et aud. Braquier sond. filz prenans et acceptans par eulx et chacun d’eulx seul et pour le tout les terres labourables vignes prez pastoreaulx maisons estanges [sic, pour étangs?] granges tectz à bestes et autres choses estans des apartenances dud. lieu sauf et reservé la grant maison et appartenances d’icelle avec le coulombier et les fruict estans au grant jardin et pré au cloux de davant lad. grant maison esquelz lesd. preneurs ne prandront aucune chose sinon les pruneaulx qu’ilz seront tenuz de faire cueillir et cuyre a leurs despens a moictié aussy a reservé et reserve lad. baillairesse le boys cloux et muraille tant taillez que de haulte fustaye ouquel ilz ne pourront prandre ne coupper [1 v°] aucuns boys mais y pourront faire pasturer les bestes dud. lieu et pour d’icelles prés vignes et choses baillees joyr par lesd. vefve et Braquier preneurs et en faire et disposer à leur plaisir et volunté aud. tiltre comme ung bon pere de famille moyennant que lad. veufve et led. Braquier son filz et chacun d’eulx seul et pour le tout seront tenuz chacun an amener les bledz fruictz vins et autres choses cueillies en lad. porcion de lad. baillairesse en sa maison en cested. ville de Tours aux coustz et despens desd. preneurs. Ce present bail faict pour troys annees et troys cueilletes prochaines consecutives et ensuivans l’une l’autre sans interval de temps commancent a la feste de toussaints prochain venant et finissnt à pareil jour lesd. troys annees revollues pendant lequel temps lesd. vefve et Braquier et chacun d’eulx seul et pour le tout ont promis et promectent faire bien et deuement et en saison convenable lesdites terres vignes et autres choses et icelles fumer cultiver labourer et ensepmancer ainsi qu’il appartient et faire lesd. vignes de toutes facons et est accordé entre eulx que le bestail qui est a present aud. lieux est a communaulté ausd. parties et le prouffit et croist qui par cy apres en adviendra se partaigera entre eulx par moictié Aussi est dict et accordé que lesd. preneurs pourront coupper et estrousser les hayes estans sur les foussez pour bouscher et entretenir les hayes dud. lieu et faire cuyre les pruneaulx et autres fruictz sera tenu lad. baillairesse fournir de moictié de la nourriture des pourceaulx qui seront [2 r°] nourriz aud. lieu pendant led. temps et aussi fourniront lesd. parties par moictié des sepmances qu’il conviendra sepmner chacun an aud. lieu et tant ainsi que par cy devant led. deffunct Braquier a tenu led. lieu aud. tiltre de mestairie et de moictié de fruictz soubs led. deffunct Brodeau et ne sera tenu ladite baillairesse fournir de moictié de chairettes ferreures ne entretien d’icelles et ne pourront lesd. preneurs faire aucuns chairez que par les affaires de lad. mestairie et par leur provision seullement et non pour aultres sinon pour lad. baillairesse. Aussi moyennant ce present bail seront tenuz lesd. preneurs et chacun d’eulx seul et pour le tout fournir chacun an a ladicte baillairesse en sa maison a Tours les choses qui s’ensuyvent savoir est a la feste saint Michel huit chappons a la feste de Toussaincts deux oyes grasses a Karesme provenant quatre poulles et à la feste de Pasques ou environ led. temps une XII^aine et demye de poulletz et aussi de rendre par chacun an en sad. maison sa part et porcion du chanvre et lins qu’elle aura aud. lieu taillez et broyés et de cent botteaulx de paille troys quarterons de froment et ung quartion de seigle. Et ont comme dessus faire tenir et entretenir etc. lesd. parties respectivement ont obligé et obligent. C’est assavoir lad. baillairesse tous et chcuns ses biens meubles et immeubles pns. et avenir et lesd. preneurs et chacun d’eulx seul et pour le tout eulx leurs hoirs et biens meubles et immeubles [2 v°] presents et avenir renonczans au benefice de division d’ordre et de discenssion et generallement lesd. parties a toutes choses ainsi faict contractees. Par leur foy et sermente etc. dont etc. en tesmoing de vertu etc. faict a Tours es presences de Jehan Ocas homme de bras de paroisse Saint Estienne, Mesine Berceau et Jehan Perault cordonniers demourans aud. Tours tesmoings a ce appellez.
[Signé] B. Terreau