Jesus Maria.
Je Martin Gregoire, docteur en medecine, sain de pensee et bon entendement fais et ordonne ce present mon testament et ordonnance de derniere volunté en la forme et maniere que s'ensuyt.
Premierement, je recommande mon ame a Dieu mon createur luy suppliant me pardonner mes faultes par moy contre luy commises et icelluy separer de mon corps de mectre et recepvoir en son paradis.
Item, je eliz ma sepulture en l'eglise monsieur Saint-Saturnyn de ceste ville de Tours en la chappelle Saint-Christofle et quant est des obsecques et services dyvyns je m'en remetz a la discrection de Anne Falaiseau ma femme.
Item, je donne aux pauvres de la communauté de ceste ville de Tours , la somme de quinze escuz sol. que je veulx estre baillé aux adscravins? desdits pauvres ou leur recepveur.
Item, je donne a Martin mon serviteur la somme de dix escuz soleil oultre comprins ce que luy puys debvoir. Item, je tend ratiffie conforme et aprouve la donation que j'ay faicte de mes meubles a ladite Anne Falaiseau ma femme passee par Terreau, notaire royal, et veulx que la sorte son effect et entend que besoing est ou seroyt par ce present mon testament luy donnant tous et chacuns mesdits meubles pour en joyr par elle et ses hoirs a tousjoursmais a la charge touteffois d'acomplir dès la presente ordonnance de derniere volunté et de paier et acquicter toutes et chacunes mes debtes et charges par s..telles. [1v°]
Item, pour l'execution de ce present mon testament je esliz mon sieur de Boisjolly mon beaupere lequel je prie en prendre la charge.
Et comme de vertu? j'ay faict signer le present mon testament a ma requete de seing de Berthelemy Terreau notaire royal a Tours , le XXIII^e jour de juing mil V^c cinquante deux ès presences de noble homme maitre René Gardette l'ung des magistratz ordinaires pour le roy au siege presidial dudit Tours et Jehan Nobilleau, demeurant paroisse Sainct-Pierre-des-Corps tesmoins appellez. [Signé] B. Terreau.
Lesdits jour et an que dessus ledit testateur a dict et declairé dict et declaire qu'il a entendu en faisant le testament cy dessus que ladite Anne Falaiseau, sa femme ne pourra estre conjoincte? au payement des dons et legs y contenuz et declarez synon quant il plaira a sadite femme et a la vivante d'icelle ce qu'il veult et ordonne par ces presentes dont il a esté jugé; presens sieur Estienne du Ruisseau, maitre ouvrier en draps de soyes et Cyrot Coulon, serviteur tesmoins appellez.
[Signé] B. Terreau