Le 09.08.1584 : ... honnestes personnes Jehan Tourtay, marchant maitre oeuvrier en draps de soye et Anne Moreau, sa femme, Nicollas Jullienne, marchant et Esperance DuCrocq, sa femme, demeurans en ceste ville de Tours savoir lesdits Tourtay et sa femme en la parroisse Sainct-Saturnyn et lesdits Jullienne et sa femme en la pairoisse Sainct-Hillaire et Jehan Ferré, marchant hostellier et Jehanne DuMoullin, sa femme, demourans ès faulxbourgs et pairoisse Sainct-Siphorian-des-Pontz de Tours lesdites femmes et leursdits mariz respectivement .. ont vendu perpetuellement par heritaige a noble homme Gatian Marbault, conseiller et secretaire des roy et royne de Navarre et damoiselle Ysabeau Falaiseau, sa femme demourans en ladite pairoisse Sainct-Satournyn icelluy Marbault absent ladite Fallaiseau, sa femme et procuratrice a ce presente .. trois corps de logis et maisons bastiz de neuf situez et respondans en la rue Traversaine dudit Tours , pairoisse Sainct-Saturnyn .. en l'ung desquelz corps se tiennent lesdits Tortay et sa femme et en deux aultres se tient a tiltre de louaige soubz lesdits Tourtay et sa femme maitre Claude de La Fons estans lesdits trois corps de logis en ung tenant joignans d'ung long par le derriere a aultres logis apartenans ausdits Tourtay et sa femme d'aultre long par le davant au pavé de ladte rue Traversaine d'un bout, a la maison de Adam de Longuemort sieur de La Goguerye et d'aultre bout a la maison de la veufve feu Jacques Viollet, plus les logis maisons et apartenances ainsy que dict est adjugées par decret ausdits Tourtay et sa femme composez de quatre corps de logis jardin et aultres esquelz se tiennent a tiltre de louaige noble homme maitre Jehan Bergerat, tresorier et foncier a levees des rivieres de Loire et Cher et dame Janne Hardy, veufve de feu noble homme Francois Jouet et ainsy que tous lesdits logis se poursuyvent et comportent et que lesdits Tourtay sa femme et .. locataires en jouissent du jourd'huy estans ou fief de l'abbé Sainct-Jullian dudit Tours ... moienans lesdits trois corps de logis respondant sur ladite rue Traversaine du propre de ladite Anne Moreau et les aultres d'acquestz faict par lesdits Tourtay et sa femme par ledit decret. Plus vendent lesdits vendeurs .. une aultre maison faisant le coing de ladite rue Traversaine vers la rue de La Sellerye et repondant esdites rues joignant d'ung long au pavé de ladite rue Traversaine, d'aultre long a la maison de ladite veufve Viollet, d'un bout par le davant au pavé de ladite rue de La Sellerye et d'aultre bout par le derriere a une aultre maison apartenant a ladite veufve Viollet et a ung nommé Foger moienant ladite maison moityé du propre de ladite Esperance du Crocq et l'aultre moictyé d'acquest dudit Jullienne estant ou fief de l'aumosnyer dudit Sainct-Jullian et chargés de vingt et ung solz six deniers tant envers l'abbé et aulmosnier de ladite abbaye que au chappellain de la chappelle Sainct-Nicollas fondee en ladite esglise Saint-Jullian et oultre de vingt huict livres de rente fonciere deue par chacun an a ladite veufve Viollet sur la moityé de ladite maison par elle baillee a ladite rente ausdits Jullienne et sa femme. Plus vendent iceulx vendeurs ausdits acquereur les trois quartes partyes des logis, maisons, appartenances et deppendances des l'hostellerye ou pend pour enseigne l'image Saincte-Marthe ou lesdits Ferré et sa femme font leur demoure situez esdits faulpbourgs et pairoisse Sainct-Siphorian-des-Pontz de Tours .. estans de l'aultre costé de la rue davant lesdits logis .. asscavoir de la quarte partye a tiltre successif escheu et advenu a ladite Demoullin, femme dudit Ferré a cause et par le deces mort et trespas de deffuncte Jehanne Fourmy vivant femme de Jehan Goussay et les deux aultres quartes partyes faisant la moytyé du total desdits logis et caves par acquest que lesdits Ferré et sa femme en ont faict de Pierre Martin (3 s. 4 den. tn. de cens), 40 s. de rente envers messieurs les maire et eschevins dudit Tours .. la presente vendaison qui a esté et est faicte pour le pris et somme de quatre cens escuz sol.s laquelle somme ladite damoiselle Fallaiseau a payee .. ausdits vendeurs .. o grace retenue .. en troys ans ... faict et passé audit Tours en la maison dudit Marbault apres mydy ès presences de honnorable homme maitre Jullian Boullay, advocat au siege presidial de Tours et Pierre de Bourgalle, clerc demourant audit Tours tesmoings et ont lesdits Ducrocq et Dumoullin femmes desdits Jullienne et Ferré declaré ne scavoir signer.
[Signé] Ysabeau Falaiseau - Anne Moreau - Duboullay - Tourtay - Jullienne - Ferré - Debourgalle pour present - Digoys.
[09.08.1584] ladite damoiselle Ysabeau Fallaiseau, femme dudit Marbault laquelle comme procuratrice ..baille a tiltre de ferme ausdits Tortay, Ferré, Jullienne et leurs femmes vendeurs nommez au contract cy dessus ...les maisons logis apartenances et deppendances .. pendant et durant le temps de troys ans ... pour ne paier par chacune desd. années par iceulx preneurs ... a lad. damoiselle Fallaiseau esdits noms la somme de trente trois escuz ung ung tiers par les quatre quartiers .. rendue en la maison dudit Marbault audit Tours ... faict audit Tours en la maison dudit Marbault apres mydy ès presences desdits Boullay et Debourgalle tesmoins nommez audit contract.
[Signé] Ysabeau Falaiseau - Anne Moreau - Duboullay - Tourtay - Jullienne - Ferré - Digoys - Debourgalle pour present.