Le XI^me jour de febvrier mil V^c quarente sept, en la court du roy notre sire a Tours , fut present en sa personne et deuement soubzmise Katherine Brisset, veufve de feu André Salmon, de la paroisse de Charentillé , laquelle a confessé avoir vendu et vend et promect garentir a perpetuité a honnorable homme, maitre André Langloys, appoticaire et varlet de chambre de la royne de Navarre , a ce prensent et achaptant pour luy, ses hoirs, etc. le nombre de troys septiers et demy de blé froment deux deniers moings de lote[...] mesnee de Charentillé de rente annuelle et perpetuelle que ladite veufve a constatee et constate presentement et deuement audit Langloys par especial sur la moictié par indivis de troys arpens de terre labourable en une piece sis en ladite paroisse ou fief de Chappitre Sainct Martin de Tours au lieu appellé par Pierre Frotiere, joignans d’ung long aux terres d’Adrian Fleurie /^(a) d’aultre a sieur Pierre Hardouyn de Mectré , d’ung bout au grand chemyn tendant de La Malerolle a Charentilly a La Pailletere et d’aultre bout aux terres de seigneurie La Renilliere, appertenants au sieur des Bugeriz, Plus sur deux aultres la moictié par indivis de deux aultres arpens de terres sis en ladite paroisse, lieu et fief que dessus, joignans d’ung long audit Fleurie, d’aultre long et d’ung bout aux terres de la mestairie de Lambenyere et d’aultre bout audit grand chemyn. Et generallement sur tous et chacuns ses aultres biens, meubles et immeubles presents et advenyr et sur chacune partie et portion d’iceulx, sans que la generallité ou [1r°] l’especiallité puissent nuyre ou prejudicier l’une a l’autre, et laquelle rente ladite veufve a promis et promect rendre et fournyr par chacun an, ès greniers de la maison dudit Langloys audit Tours aux termes de Notre Dame de Mars /^(b) Saint Jehan Baptiste /^(c) Saint Michel et Noel, par quart premier payement commanczant audit jour de Notre Dame de Mars prochain venant, et a compter a chacune desdites terres payer etc. O grace retiré par ladite veufve et a elle du par ledit ac. La presente vendaison faict pour demourer par ladite veufve faicte envers ledite Langloys de la le pris et somme de soixante dix livres tournois qu’elle que ladite restant et faisant le parfaict en laquelle restant et faisant le parfaict payement de la somme de sept vingtz livres dix sept solz huict deniers tournois, en laquelle somme de VII^XX l. XVII s. VI d. VIII d. ledit deffunct André Salomon, son mary, lors de son deces estoyt tenu et redevable audit Lan Langloys, par obligation passé en ladite court par Ambroys Pivot, notaire, soubz icelle le vingt six^e jour de may l’an mil V^c quarente six pour vendaison de blé, laquelle obligation a esté aquicté par ladite veufve et luy a esté presentement rendu en noz presences et des tesmoings cy apres nommez par ledit Langloys. Et de laquelle somme ladite veufve avoyt depuys respri[...] [2r°] acquereur, comme elle a confessé de laquelle somme elle s’est tenue et tient contante et en quicte icelluy Langloys, o grace reservee par ladite veufve et a elle donnee par ledit acquereur, telle qu’en luy rendant ladite par ladite veufve ladite somme de soixante dix livres tournois et les luyaulx coustz et mises dehs d’huy en troys ans prochain venant, a ung seul peyement en ce cas le present contract sera et demourera nul comme non advenue. Et quant a tout etc. oblige ladite veufve, elle ses hoirs et biens, etc. Renoncans etc. Fidem. etc. dont etc. Presents Guillaume Casteau, maitres menuisier, et Denys Fontayne, tonnellier, tesmoings appellez.
[Signé] B. Terreau.

a. Signe inscrit par le scribe. — b. Signe inscrit par le scribe. — c. Signe inscrit par le scribe.