Le vingt et ungiesme jour de juillet mil V^c cinquante ung, en la court du roy notre sire a Tours , fut present en sa personne et deuement soubzmis, honnorable homme maitre Pierre Boullay, secretaire et clerc d’office de madame duchesse de Berry et recepveur des aydes et tailles de Lodun , lequel a faict et constitué et, par ces presentes, faict, nomme et constitue, ordonne et estably honnorable homme maitre René Gardette, conseiller du roy notredit sire au siege royal dudict Tours , son procureur o pouvoir general et especial, auquel il a donné et donne pouvoir et mandement special de pour et en son nom vendre par moittié, eschanger, bailler a rente et aultrement desposer comme bon semblera audit preneur pour telle somme et deniers que bon luy semblera, de tout tel droict part et portion, nom, raison et action que ledict constituant a et peult avoir, luy comperte[?] et apartient ou lieu mestairie appertenance et deppendenance, vulgairement appellé Fresne, assis en [1v°] la paroisse de Perray et Rochecorbon , comme le tout desdites choses se poursuyt et comporte sises ès fiefz de Chappiere de Tours et de Perrey et joignant partie d’icelles choses aux terres des hoirs feu Jehan Nauzien demourant d’ausime[?]. Ensemble de recepvoir lesdites commes de deniers d’icelluy a qui sondit procureur aura vendu et composé en bailler, acquect et quicte [...] pour et au nom dudit constituant, et au garentaige desdites choses pour icelluy constituant, obliger tenir et cha[…] ses autres biens, meubles et immeubles presents et advenir. Promectant avoir peri[…] et agreable lesdits eschange et les contract que sera et, pour raison desdites choses, pourront estre faictz par sondit procureur pour lesdites choses, lesquelz il a desapresent, comme pour lors et des lors, comme pour apresent euz et a pour agreables, promectant en tant que besoing sera faire et passer amples lectres de ratiffication dudit contract, apres qu’il aura esté faict et generallement. etc. promecctant etc. dont etc. faict a Tours ès presences honnorable homme sieur Gacian Barquyn, sieur de La Millardiere, beaupere dudit constituant André Faru, canonnier et artillier, et Guillaume Henry, harquebutier et faiseur d'espees [...] de gibesiers, tesmoings appellez. constat en interligne et apostille mestairie /^(a) et Rochecorbon /^(b) sises ès fiefz de Chappierre de Tours et de Perrey et joignant [2r°] partie d’icelles choses aux terres des hoirs feu Jehan Nauzien de Dausimie[?] /^(c) faire /^(d) lectres esté /^(e) honnorable homme sieur Gacian Barquyn, sieur de La Millardiere, beaupere dudit constituant que aprouvons.
[Signé] G. Barquyn, B. Terreau.

a. Signe inscrit par le scribe. — b. Signe inscrit par le scribe. — c. Signe inscrit par le scribe. — d. Signe inscrit par le scribe. — e. Signe inscrit par le scribe.