Le trente^me jour d’aoust mil V^c cinquante deux, en la court du roy notre sire a Tours , fut personellement estably et deuement soubzmis honnorable homme, sieur Jehan Davy, patissier de la royne Leonor, demouran audit Tours , lequel a confessé avoir vendu et vend et promect garentir a perpetuité a honnorables personnes, sieur Gervays Rigot, escuyer de cuysine du roy de Naverre demourant audit Tours , a ce present et et a Katherine Davy, sa femme, a ce presents et achaptans pour eulx, leurs hoirs et ayans cause, apres que ladite Katherine a esté de sondit mary auctorisee une piece de terre en labeur, prez, vergers et pasturages, contenant dix arpens et ung quartier avec les jardrins et estrages[?], avec les maisons, granges, tectz a bestes estans dedans, contenans demy arpent le tout en ung tenant, scituees en la paroisse et fief de Samblanczay et de Dolbeau Chambellain, joignant d’ung long et d’ung bout a la forest et taillis de Samblanczay , d’aultre long aux terres de Loys Chambellain, [1v°] d’ung bout au chemyn par lequel l’on va de Samblanczay a Tours . Item plus une piece de terre, landes et brueres, [brineres], contenant quatre arpens ung quartier et demy et quart de quartier sise en ladite paroisse et fief de Samblanczay , joignant d’ung long ausdits acquereurs, d’aultre aux terres de Jehanne Davy, leur seur, d’ung bout au chemyn tendant de Samblanczay a Maillé , d’aultre au chemyn des […] a La Roche Behuart. Plus ung arpent et ung quartier de terre en labeur a prendre en une piece contenant troys arpens et demy quartier le long de la piece des brineres[?], fief de Samblanczay , joignant d’une part a la forest de Samblanczay , d’autre part aux terres des hoirs feu Jehan Pestilleau et d’autre au chemyn allant a Samblanczay . Plus deux arpens de vigne en ladite paroisse et fief au lieu des Tabardieres, ung chemyn commung passant a travers contenant deux arpens, joignant d’une part aux vignes de La Boissiere Jamet[?] chemyneant et Loys Lucas, d’aultre aux vignes de La Millonnyere et de Michel Massoteau, d’aultre aux terres des Tabardieres et d’aultre au chemyn tendant de Tours au Mans , tout ainsi que lesdites choses sont escheues et [2r°] advenues audit vendeur par partages faict entre luy, ladite Katherine et Jehanne Davy, ses seurs, de succession de ses deffunctz pere et mere et de Thienette Tashard, leur ayeulle maternel, estans aucune chose en reserver ne retenir par ledit vendeur. Chargees lesdites choses envers ledit sieur de Samblanczay de quatre solz six deniers tournois pour chacun arpent de ce qui est en son fief, et envers ledit sieur de Chambellain, de cinquante solz tournois et deux chappons de cens et rente, a cause de quatre arpens ou environ estans en son fief, promis en la premiere piece cy dessus pour toutes charges et debvoirs, quictes des arrerages jusques a huy a avoir etc. O tout droict de saisure possession etc. et pour en faire etc. La presente vendaison faicte pour le pris et somme de neuf cens soixante une livres tournois de laquelle somme ledit Davy, vendeur en a receu presentement contant desdits Rigot et sa femme, presents ledit notaire et tesmoing, la somme de sept cens livres tournois en escuz d’or sol pistelletz, doubles ducatz, ducatz simples, angelotz et monnoye au poix et pris de l’ordonnance et paravant ce jour la somme de deux cens soixante une livres qui est le parfaict de ladite somme de neuf cens soixante une livres tournois, de laquelle somme ledit Davy, vendeur, s’est tenu et tient contant et en a quicté et quicte lesdits acquereurs, leurs hoirs et ayans cause, et deux escuz sol de vin de marché. Et promect ledit Davy, vendeur, faire ratiffier ces presentes a Martine Regnard, sa femme, laquelle pour ce faire il a auctorisé et auctorise. Et quant a tout etc. obligent lesdites parties respectivement mesmement ledite vendeur audit garentage soy, ses hoirs et biens, meubles et immeubles presents et [2v°] advenir renonczans etc. Fidem. etc. dont etc. Presents Francoys Charpentier, bouzilleur et blanchisseur demourant contre la porte de La Foyre Le Roy dudit Tours , et Jehan Fauqueton, maitre cordonnyer audit Tours , tesmoings appellez.
[Signé] Jehan David, Jehan Fauqueton, B. Terreau.