[Transcription partielle :] Nobles personnes, Thomas Lecoustellier, seigneur du Puy et receveur des aydes et tailles pour le roy notredit sire estably audit Tours , et damoiselle Marie Leclerc, sa femme et espouze, […] demourant audit Tours , lesquelz [...] ont confessé avoir vendu, ceddé et transporté […] a honnorable homme René Philippes, marchant demourant audit Tours a ce present et achaptant pour luy, Raoulline Gaultier, sa femme, leurs hoirs et ayans cause, troys corps de maisons tenans l’ung a l’aultre, court et appertenances d’iceulx, [1v°] scituez et assis en la parroisse Saint Denys de ceste ville de Tours ,ou fief du Tresaurier en l’eglise monseigneur Sainct Martin dudit Tours , soubz l’ung desquelz corps est le portail par lequel l’on passe pour aller du Carroy des chappeaux à l’eglise monseigneur Sainct Martin dudit Tours , joignant lesdites choses vendues d’une part, du costé d’amont a la maison de maitre Jacques Besnyer et de Jehan Mesnier[e], pelletier, d’aultre part du costé dudit Saint Martin audit Besnier et a maitre Loys Dusou, advoat a Chinon , et du costé d’abas a la maison des hoirs feu Jehan Dupas et, d’aultre part a la rue de La Roubisseoyt, pour aller de la rue du Petit Souleil au Grand Marché, chargees lesdites choses de dix deniers de cencif audit tresaurier /^(a) de cinq solz de debvoir ou rente deubz a cause dudit portal [2r°] au roy notredit sire a cause de son chastle de Plessis /^(b), et oultre lesdites choses chargees de vingt solz tournois de rente a l’abbesse et couvent de Beaumont lez Tours, et de vingt cinq solz a la bource des cierges en ladite eglise Saint Martin et encores le chappellain de la chappelle Saint Blanc fonde en l’eglise de Tours de dixneuf solz tournois de rente pour toutes charges et debvoirs, quictes des arrerages, jusques a huy et tout, ainsi que lesdites choses vendues sont escheues a ladite damoiselle, venderesse de la succession de deffunctz nobles personnes, maitre Clerambault Leclerc et Anne Fame, ses pere et mere, sans aucune chose en reserver ne retenir et desquelles choses lesdits vendeurs se sont devestuz et desaisiz et en ont vestu et saisi ledit acquereur par ces presentes, a les avoir etc. o tout droict de saisure possession etc. Et pour en faire etc. La presente vendaison faicte pour le pris et somme de deux [2v°] mil cent livres tournois, de laquelle somme ledit Philippes, acquereur a payé contant ausdits vendeurs presences ledit notaire et tesmoings. […] [3r°] […] Et par especial audit garentaige obligent lesdits vendeurs, leur maison, court, jardrin et appertenances d’icelle, ou de present ils demeurent en la parroisse Sainct Pierre du Boille dudit Tours , joignant d’une part a la rue des Cordeliers, d’aultre au couvent desdits Cordeliers et d’aultre a la maison de la veufe maitre Ollivier Molan, sans que la generallité ou l’especiallité puissent nuyre ou prejudicier l’une a l’autre, renonczans au beneffice de division et ordre de disculion[?] et oultre ladite vendresse au beneffice de velley[...] an et authentique siqua mulier par lesquelz est dict que femme ne peult intercedder parlegect[?] ne promectre pour aultruy [3v°] […] faict et passé audit Tours ès presences de sieur Charles Soumain, marchant demourant audit Tours , et Estienne Oger, natif de Alenczon , servieur demourant audit Tours , tesmoings appellez.
[Signé] Lecoustelier, Marie Le Clerc, René Phelippes, Soubzmain, B. Terreau.
Ledit jour et an que dessudit, ledit René Philippes s’est transporté esdits troys corps de maisons par luy acquis par le contract cy dessus, desquelz et de leurs appertenances il a prins possession et saisure reelle et actuelle en allant et chemynant par iceulx, fermant et ouvrant les huys, disant qu’il en prenoit possession dont il m’a requis ce present acte que luy ay octroyé pour luy [4r°] servir ce que de raison. Presents a ce, sieur Charles Gaultier, appoticaire, Joseph Chaussi, puitier, et Charles Soumain, marchant, voisins voisinaulx desdites maisons, tesmoings appellez.
[Signé] B. Terreau ⁽¹⁾.

Et le vingt sept^me jour de may ensuyvant oudit an mil V^c cinquante six […] ledit René Philippes, acquereur, a payé et baillé manuellement contant audit maitre Thomas Lecoustellier […] 1600 l. t. […] audit Tours ès presences de sieur Charles Soumain, marchant, et Mathurin Le Rennoysay, tesmoings appellez.
[Signé] Lecoustelier, B. Terreau.
[4v°] Joseph Chaussi, puitier
Charles Gaultier
et Charles Soubzmain^(c).

a. Signe inscrit par le scribe. — b. Note ajoutée par le notaire.
1. La première partie de du texte date du 10 avril 1556.