[Transcription partielle :] [...]^(a) Anthoine Bohier, escuyer, […] sceau, gentilhomme de la maison de mondict seigneur, et dam[oiselle] Ysabel Dnoremont, son espouze, de luy suffizamment auctorizee par devant nous, notaire a Largery , pais de Champaigne , en Tartenoys , tant en leurs noms que comme procureurs et eulx faisantz fortz de Jehan de La Loyre, aussy escuyer, sieur de Sazeret et comissaire ordinaire des guerres et de damoiselle Marguerite Bohier, sa femme, ausquelz ilz promectent faire ratiffier et avoir pour agreable le contenu en ces presentes dedans Nouel prochainement venant, a peyne de tous despens, dommages et interestz en leurs propres et privez noms, et Jehan de Bayard, escuyer, sieur de La Fons, conseiller et maitre d’hostel de la royne mere du roy, et damoiselle Marye Bohier, son espouze, aussy par luy presentement auctorizee par devant nous, quand a ce que s’en suyt, demourant audit lieu de La Fons, paroisse de Saint Jehan de Bausac , pays d’Auvergne , lesdits Anthoine, Marye et Marguerite Bohiers, heretiers en partye de deffunct maitre Thomas Bohier, leur frere aisné, vivant abbé de Bernay , doyan de l’eglise de Tours , seigneur de Nazelles et de Panchien, tous lesquelz susdits establiz et chacun d’eulx, seul et pour le tout, sans division de partye ne de biens, renonczans audits beneffices de division, ordre de droict et discution, et mesmement lesdits Ysabel Demiremont et Marye Bohier, femmes desdits Anthoine Bohier et de Bayard, et encores ledit Anthoine Bohier pour ladite Marguerite Bohier, femme dudit de la Loyre, aux beneffice de Velleyan, a l’espistre de divi Adriani, a l’autenticque « si qua mulier »^(b) et a tous autres droictz et faveurs faictz et introduictz en faveur des femmes, l’effect desquelz leur avons declaré et faict entendre estre telz que femes constituees en lyen de mariage ne se peulvent vallablement obliger, intercedder, ne respondre pour aultruy, mesmes pour leurs mariz sans avoir par expres renoncé ausdits beneffices, et que si elles l’avoyent faict qu’elles n’en seroient tenues et en pourroient estre relevees, ont declaré, recongneu et confessé par devant nous comme audit jugement, autre deliberations, bons grez, proces et franches voluntez, et sans aulcune persua[sion] ne contraindre vendu, ceddé, quicté, delaissé et transporté et, par la teneur de ces presentes, vendent, ceddent, quictent et transportent, des mainctenant a tousjoursmays, et promectant garentir, sauver, delivrer et deffendre de tous troubles et empeschementz quelz conques, a perpetuitté, a noble homme Jehan Le Royer, viconte de Chateauneuf, conseiller et secretaire desdits mandements et finances des roy et royne de Navarre , demourant audit Tours , paroisse de Sainct [1v°] [...] composé d’ung grand corps de logis, pavillon, [...] d’ardoyse, boullangerye, pressouer, grange, of[...], chapp[…], fuye et autres bastimantz et ediffices dudit lieu, jardins, ousches et vergers, le tout en ung, tenant contenant ung arpent ou environ, cloz de murailles et foussez, avecques deulx cuves estant dedans ledit pressorier, et tous autres vaisseaux et ustancelles servantz audict pressouer. Plus consiste ledit lieu en une garenne sceant pres la parclosture dudit lieu, plantee en boys taillie, contenant de sept a huict arpentz ou autre. Plus en ung clos de vignes cloz a l’entour de hayes vines et tenant cinq arpentz ou environ sceant pres ledict lieu. Plus en ung autre cloz de vigne appellé le cloz Picquely contenant deulx arpentz ou environ. Plus en une mestairie, pres ledit lieu, bastye de logis pour le pestayer, granges, estables et tertz a bestes, le tout couvert de thuille, court, puy, jardins, ousches et d’ung quartier de vigne pres le jardin de ladite mestairye, et en ung tenant estant en nombre de vingt troys a vingt quatre arpentz de terres labourables ou environ, en plusieurs et diverses pieces, dont y en a une contenant douze arpentz ou environ, tenant despuis ladite mayson seigneurialle dudit Pauchien, jusques aux maisons et aystres de ladite mestairye, et les autres pieces en divers lieux et endroictz de la parroisse de Maillé , et ainsy que lesdites terres et choses de ladite mestairye se poursuivent et comportent, et comme le mestayer dudit lieu en a cy davent jouy et jouist encores a present. Plus conseiste ledit lieu de Pauchien ès pieces de prez et ysles quy s’ensuivent qui sont comprinse en la presente vendaison. C’est assavoir une piece de pré quenanval^(c), garranne appellé l’Esle Bois Gaultier, scitué pres le port de Maillé , contenant de sept a huict arpentz ou environ, joignant des troys partz a la riviere de Loyre et d’aultre part à l’isle des hoirs feu Ollivyer Robichon. Plus une autre piece d’isle et pré guenan^(d) appellee Les Buronnieres, scituee devant le port Fourcault, contenant de troys a quatre arpentz ou environ, joignant des deulx costez a la riviere de Loyre d’un bout a La Vielle Boyre et d’autre bout a (blanc). Plus une autre piece de pré guenan, cloz a foussez, appellee le Cloz Rayer, contenant cinq quartiers ou environ, joignant d’une part aux prez de Jacques Cormant, d’autre part a Pierre Morier, et d’un bout a La Grande Boire de l’Islatte, d’aultre part a Martin Allyot et autres. Plus une autre piece de pré appellé l’Arpent de Bercellonne, contenant ung arpent, assize en La Grand Yslatte, joignant [2r°] (...) ont aux cheveraulx de Pierre Babin, Jacques Beauchesne et […]. P[lus] [une] piece de pré contenant ung arpent ou environ, assize pres la plance du Portan, appellee Le Grand Arpent, joignant d’un long aux prez du sieur de Chastry, d’autre au pré de Jacques Christofle, d’un bout aus varannes de Martin Allyot et autres, et d’aultre a Michel de Marsan et autres. Plus une autre piece de pré appellee Le Trebuchet, size pres la planche de Gasnay, contenant neuf quartiers ou environ, joignant d’ung long a La Ballize, d’aultre aux varannes de Urbain Picard et aultres. Plus une autre piece de pré, size au lieu de Joussalen, pres ladite planche de Gasnay, contenant cinq quartiers ou environ, joignant d’ung long au pré de Estienne Fortin a cause de sa femme, d’autre Pierre Supplice et sa femme, d’un bout a La Grand Boire, et d’aultre bout au recoing aux arrieres boyres et a La Ballize de monsieur le compte de Maillé . Plus une autre piece de pré au cloz du Carreau, pres la planche de Trivalle, contenant demy arpent ou environ, joignant d’une part a La Grand Boyre, et d’autre part a Jacques Racault, d’aultre a la veufve Jehan Caire, et d’aultre part au prez de Beauvoys. Plus une aultre piece de pré guevan^(e) appellee le cloz Hallebert, scituee pres la planche Sainct Ven[ant] de Maillé , contenant cinq quartiers ou environ, joignant d’un long au prez des hoirs feu Magdalaine Cairré, d’aultre aux cheveuraulx de la vefeu Simon Cairé, et autres d’un bout a La Grand Boyre, et d’aultre bout au jardin de Jehan Mentanteau. Plus une autre piece de pré pres la corvee du sieur de Maillé , contenant neuf quartiers ou environ, joignant d’un long a ladite corvee, d’aultre au prez des Champize, et autres d’un bout a Ladite Grande Boire, et d’aultre a (blanc), de laquelle piece de pré on a accoustume bailler et delaisser par chacun an ung arpent pour la provision de ladite mestairye. Plus une autre piece de pré deuement papellee Le Cloz de la Herse, contenant cinq quartiers ou environ, joignant d’un long et bout aux pres des Maraiz, baillé et delaissé pour la provision de ladite mestairye. Plus une autre piece de pré sceant pres la rue Javot, contenant ung arpent ou envyron, faysant moictié de deulx arpentz qui changent chacun an en la jouissance de la cuillette, desdictz deulx arpentz comme estant indivisez et subjectz audict changement entre le sieur dudit Panchien et Jacques Voysin et autres auxquelz [2v°] (...) Item consiste ladite seigneurye de Panchien en droictz […], justice [haulte, moyenne] et basse, honneurs vassaulx et subjectz, cens, rentes, lotz, ventes et autres droictz, proffictz et esmollumantz dudict fief et seigneurye, et mesmes en quatre foyz et hommaige deubz a icelle seigneuriye a (…) [3r°] (…) de la lorme lesdits Debure cy dessus pay[…] chacun an a la requeste dudict Maillé , et oultre est deu au seigneur du fief de Chastigne, a cause de ladite Ysle Boysgaultier seant oudit fierf (...) [3v°] (…) faisantz mantien dudict lieu, terre, […], apartenances d’icelle, lesquelz tiltres et (…) [4r°] (…) Faict et passé audict Tours en la maison dudit Le Royer, ès presences de honnorables hommes maitre Julyen Odin, sieur des Grands Maisons, conseiller et maitre des comptes de mondit seigneur en la chambre de ses comptes, estably audict Tours , Julian Boulay, advocat au siege presidial de Tours , Jehan Mahondeau, Adrien Salmon, marchans, et Jehan Prieur, clerc, demourans audit Tours , tesmoings.

a. Acte très endommagé. — b. Guillemets inscrits par le scribe. — c. Terme incertain. — d. Terme incertain. — e. Terme incertain.