Messire André Mesnaiger, prebstre, curé d’Oynville pres Meilhan, baille, cede et delaisse des maintenant a tousioursmes a Jehan Duchemin dit Donneau, barbier et cirurgien juré en ceste ville de Chartres , present, et a Marguerite, sa femme, absente pour eulx, leurs hoirs etc, la moictié des deux tierces parties et porcions d’unes masures ou souloit avoir habergement, et ou de present y a cave, sicomme etc, assis a Dampnemarie en Beausse devant l’eglise dudit lieu, juxte les hoirs feu messire Pierre le Hudoyer d’une part. Item la moictié des deux pars et porcions de deux mines de terre assises audit lieu de Dampnemarie , le tout a plain declairé en certaines lectres de vendicion et transport sur ce faictez et passees soubz le scel de la chastellenie de Chartres le vingt troiziesme jour de mars l’an mil cinq cens ung signees J le Sueur. A telles charges et reddevances comme ce peult devoir. Cestz bail et delaiz faiz pour et moyennant le pris et somme de cent solz tournois pour le principal et trente solz tournois pour les interestz et dommaiges que ledit messire André Mesnaiger a et peult avoir souffers, parce que ledit Duchemin et sa femme ne l’ont peu faire joyr d’icelluy heritaige dont etc quicte etc. Et lesquelz droiz dessudits iceulx Duchemin et sa femme avoient cedez et promis garandir a tousioursmes audit Mesnaiger. Et dont etc, quicte etc, promectant non venir contre. Presens a ce pour tesmoings Jehan Brebier et Guillaume Troillart, demourans a Chartres .