Pierre Roger, demourant a Baillau l’Evesque , vent, cede et trasporte des maintenant a messire Pierre Hoyau, prebstre, demourant a Senermont en ladite parroisse, acheteur, present etc, pour luy etc, la moictié d’une piece de terre esgectee en boys, assise es tailliz d'entre Senermont et Tessonville, dont l’autre moictié appartient a Jehan Roger, frere dudit vendeur, icelle moictié juxte ledit Jehan Roger a cause de l’autre moictié d’une part, et sommiere a Michelet Tardineau d’autre part, abutant d’un bout a messire Pierre de Gauville, chevalier, et d’autre bout a la veusve Perrot de Sainct Germain. Pour icelluy heritaige avoir, tenir, posseder, en joyr et user par ledit messire Pierre Hoyau, acheteur, durant le temps du bail qui en a esté fait audit vendeur. Vente faicte pour unze livres dix solz tournois, dont etc, quicte etc, promectant et garantissant, obligeant renoncant etc. Presens a ce pour tesmoings Jehan Hoyau, demourant audit lieu de Senermont , et Jehan Brebier, demourant a Chartres .