[Transcription partielle :] Le vingtseptiesme jour de may mil cinq cens quatre vingtz deux, en la court du roy nostre sire et de monseigneur a Tours , personellement establyz et deuement soubzmis, Thomas LeCoustellier, escuier, sieur du Puy, conseiller au conseil privé du roy de Navarre et maitre ordinaire de son hostel, et Francoys LeCoustellier, aussy escuier, gentilhomme de la chambre du roy de Navarre , son filz, demourans audit Tours , parroisse Sainct Pierre de Boille, d'une part, et dame Jehanne Georget, dame des Creneaulz, La Roche Vernant, Vaulz et La Guigeaudiere, veufve de feu messire Loys De Fontenay, vivant chevallier, demourante audit lieu de La Roche Vernant, parroisse de Sougé , pays du Bas Vendommoys , d'aultre part, lesquelz ont faict et font entre eulx les accords, convenntions, promesses et obligations qui s'ensuivent. C'est asscavoir que lesdits sieurs LeCoustellier, pere et filz, ont consenty et accordé que a ladite dame des Creneaulz que touttesfoys et quantes qu'elle baillera audit sieur Lecoustellier, filz, et a damoiselle Vallance de Haubergeon, sa future espouse, lesis[...] appartenant a ladite dame de la terre et seigneurye de La Chenalmiere, ses appartenances et deppendances, sittué en la parroisse de Sainct Jacques des Gueretz Martin du Boys, ainsi qu'en jouissoit deffunct Cezard de Haubergeon, vivant escuier, sieur de ladite terre et segneurye, pere oncle de ladite damoiselle, au lieu et pour recompense de la jouissance des terres et seigneuryes de Vaulx et de La Guigeaudiere, leurs appartenances et deppendances, ce jourd'huy bailles et delaisses par ladite dame en faveur du mariage dudit sieur Lecoustellier, filz, et de ladite damoiselle de Haubergeon sur et en advancement du droict sucessif de ladite damoiselle. En ce faisant sera delaissé et remys ès mains de ladite dame la jouissance [1v°] desdites terres et seigneuryes de Vaulx et de La Gingeaudiere, pour au lieu d'icelles terres prandre jouir par lesdictz Lecoustellier filz et ladite damoiselle, sa future espouse, de l'usuffruict de ladite terre et seigneurye de La Chenatiere, tout ainsy qu'ilz eussent faict ou peut faire desdites terres de Vaulx et de La Guignaudiere suivant le contrat dudit mariage. Et quant a tout etc. (...). Faict audit Tours , en la maison ou est de present logee ladite dame, près le carroy de La Foire le Roy, parroisse Sainct Pierre de Boille dudit Tours , a l'apres dinee de ce jour, ès presences de Jehan LeBlanc, escuier, sieur du Reau, maitre d'hostel de la royne mere, conseiller du roy, tresorier general de France audit Tours , et noble homme maitre Nicollas LeClerc, sieur de Curailles, conseiller du roy et de monseigneur, juge et lieutenant general au bailliage de Touraine , demourans audit Tours , tesmoings.
[Signé] Lecoustelier, Lecoustelier, Jehanne Georget, Jehan LeBlanc, LeClerc, Digoys.