1516, 18 septembre — Loches

[f° 124] Le XVIII^me jour de septembre 1516, A Loches , En la court du Roy nostre sire à Loches , personnellement estably et demourant soubzmys, Hanry de Lespignes, borrellier, present, demourant aud. Loches , lequel a promis, promet, doibt et sera tenu faire pour la ville de Loches , le nombre de ving deux seaulx de cuyr, telz, semblables ou meilleurs que sont quatre seaulx que led. Delespignet aujourd’huy baillez et delivrez a lad. ville. Et sera tenu les rendre faictz, parfaictz, à lad. ville dedans quinze jours prochains venans, jour esquelz XXII seaulx de cuyr, ensemble pour les quatre quil a ja fournyz et baillez a lad. ville, sera payé aud. Delespignet par honnorables hommes et sages M^es Denis Mamyneau de et Jehan De la Rebertière, esleuz de lad. ville adce presens et personnellement estably en lad. court oud. nom, la somme de ving cinq livres. Delaquelle somme luy a este payé contant en ce jour par lesd esleuz sera baillé ce jourd’huy la somme de 10 l. Et le reste de lad. somme et parfait de la besoigne, pour la seureté de laquelle besoigne led. De Lespignet a baillé et presenté Simon Bouchet, marchant cordonnyer dud Loches , present, personnellement estably et soubzmys en lad. court. Lequel, en deffault de faire et ce accomplir ce que dessus par led Delespignet, a promis et s’est obligé a faire faire et rendre lesd. seaulx à lad. ville dud. Loches comme aussi y a [f° 124v] obligé [tous] ses biens et meubles et immeubles presens, etc., advenir. Etc., promect, etc.
Presens honnorables hommes Symon Perrigault, praticien en court laye dud Loches , et de Jacques Regnoux, praticien dud Loches, tesm. Eustache Sainct, barbier, serviteur de Georges Thomas, aud. Loches . [Signé] M. Roux