[f° 1] Despenses et mise faicte par Estienne Moreau, esleu sur le fait de la communalité de ceste ville d’Amboise et commis de par les habitans de ladicte ville a recevoir les deniers communs appartenant a ladicte ville ou lieu de feu Jehan Demoie, en son vivant receveur desdits deniers communs pour l’annee finye le dernier jour de janvier l’an mil cinq cens, par le commandement et ordonnance des advocat et procureur du roy notre sire ou bailliaige d’Amboise maistre Francoys Dajollet, Jehan Rougemont l’aisné, Guillaume Bourgeau, Leon Barre, Jehan Gaudion, Pierre Ancheron^(a), Jehan Lomtier^(b), Jehan Pertuys, Simon Gonellard^(c), Jehan Duruau, Jamet Macquain, Guillaume Damau^(d) et René Gonellard^(e), tous esleuz et commis en l’assemblee de ladicte ville faicte par devant maistre Jehan Desquartes, licencié en loix, lieutenant general de monsieur le bailly dudit Amboise, le XXIIII^e jour de novembre l’an que dessusdit mil cinq cens, pour faire preparer et ordonner de l’entree du roy et de la royne faicte en ceste dicte ville d’Amboise le mercredi deuxieme jour de decembre l’an que dessusdit, en la maniere qui s’ensuit.

Et premiement

A Guillaume Bourgeau et Jamet Macquain, pour ung voyaige fait le XXV^e jour de novembre l’an que dessusdit mil cinq cens, de ceste dicte ville en la ville de Tours , par le commandement des commissaires dessus nommez, pour querir et achecter des draps et fil de soye pour faire deux poilles pour le roy et pour la royne a leurdicte entree, auquel lieu de Tours ilz ont cousché une nuyt et esté paié par ledit Estienne Moreau la somme de XL s. tournois, qui est au pris de [f° 1 v°] XX s. tournois a chacun deulx pour leur sallaire et despens ainsi que peut apparoir par quictance cy rendue. Pource, cy XL s.
Par quictance

A Loys Bruslé, marchant demourant a Tours , a esté baillé et paié par ledit Moreau, commis dessusdit, la somme de XLIIII l. X s. tournois. Savoir est XVII l. XVII s. VI d. pour cinq aulnes et demye damas rouge au pris de LXV s. tournois l’aulne. Item, XIIII l. XII s. VI d. pour quatre aulnes et demye damas blanc audit pris de XLV s. l’aulne. Et XII l. tournois pour deux livres et demye de soye blanche et violee. Le tout par luy baillé et livré ausditz Bourgeau et Macquain, et mis et emploié a faire les poisles du roy et de la royne pour leurdicte entree, ainsi que peut apparoir par quictance dudit Bruslé. Pource XLIIII l. X s.
Par quictance

A Estienne Moreau, cousturier, pour la façon des deux poisles faiz, l’un de damas rouge pour le roy et l’autre de damas blanc pour la royne. Mect cy ledict Moreau la somme de LX s. tournois. Pource LX s.

A Jehanneton Pesse, lingiere, pour ses peines et salaires d’avoir fait les franges desditz deux poisles de la soye, dont cy dessus est faictes mencion, et icelles mises et courues ausdits poisles. A esté paié par ledit Moreau la somme de XXXV s. tournois. Pource XXXV s.

[f° 2] A Michel Biron^(f), marchant, pour soye rouge poisant quatre gros par luy baillé pour parachever les franges desdictes poisles, a esté paié par ledit Moreau pource VIII s. IIII d.
Par quictance

A Jehan Royer, mercier, pour soye jaune poisant six gros et demy par luy baillé pour les causes que dessus, a esté paié pource XIII s. VI d.
Par quictance

A luy, pour aguillectes et latz blanches et rouges par luy baillé emploiees a atacher lesdits deux poisles, a esté paié II s. VI d.

A Pierre Duboys, aussi mercier, pour autre soye rouge et jaune achaptee en blot pour servir comme dessus a parachever lesdites franges, a esté paié XVI s. IX d.
Par quictance

A Julian Bricet, mercier, pour troys escheveaux d’autre soye jaune et rouge par luy baillé pour servir comme dessus, a esté paié XVI s. VIII d.

Audit Bricet, pour une livre fil blanc, ung quarteron d’aguilles baillé aux femmes et filles qui ont couru le pavillon du carroué, a esté paié V s. XI d.

A Simon Gonellard, pour une aulne de bougran bleu et quatre aulnes de ruben sangeant^(g) emploié aux choses dessusdites, a esté paié XX s. X d. Savoir est VII s. VI d. l’aulne de bougran et l’oultre plus pour ledit ruben. Pource XX s. X d.

[f° 2 v°] Audit Simon Gonellard, l’un desdits commissaires, a esté baillé et paié par ledit Moreau la somme de dix solz tournois pour subvenir a paiez plusieurs menues choses pour les affaires de ladite entree tant a varletz, serviteurs que autres personnes. Pource X s.

A Roulin Hainart^(h), menusier, a esté paié pour ledit Moreau la somme de XXVII s. VI d. pour avoir fait deux chassis pour faire lesdits deux poisles et huit bastons pour les porter ; et aussi pour sept toises et demye de repartaige par luy baillé qui ont esté mises au moulin de l’aumosne pour servir a tendre les cordes ; deux toises et demye de seaige pour servir aux chaffaulx ; et pour avoir fait deux fenestres bastardes aux lucanes des goutieres de la maison de la ville ; ainsi que tout peut apparoir par quictance. Pource XXVII s. VI d.
Par quictance

A petit Jehan Fauvert, paintre, et ses compaignons, a esté paié par ledit Moreau la somme de IX l. VIII s. IIII d. qui deue leur estoit pour avoir fait ung porc espy et une hermyne et deux escuczons coronnez. Et aussi pour avoir paint deux gros pilliers de boys mis ou carroué de ladite ville qui portoient lesditz porc espy et hermyne, quarante huit banerolles, XLVIII bastons pour lesdictes banerolles, huit bastons pour lesdits poisles. Et avecques ce, pour avoir paint ung estandart, [f° 3] ung escuczon, ung escripteau et troys coronnes, et ung chappeau pour devoir jouez quelque mistere. Le tout pour ladicte entree, ainsi que tout peut apparoir par quictance. Pource IX l. VIII s. IIII d.
Par quictance

A Jehan de Farce, potier, pour terre a faire potz par luy baillee pour servir a faire les choses dessusdites, a esté paié pource II s. VI d.

A Jehan Lepaige, charretier, pour ses peine et salaire d’avoir esté querir en deux charretes acoublees ensemble, en la forest dudit Amboise , ung grant arbre dont a esté fait ung mast mis ou carroué de ladicte ville, sur lequel a esté fait ung grant pavillon qui couvroit tout ledit carroué durant ladicte entree, a esté paié la somme de X s. tournois. Pource X s.

A Jehan Deforges, charron, pour ses peine et sallaire d’estre alé a ladicte forest couppez ledit mast et autres choses qu’il a faictes, a esté paié pource II s.

A Guillaume Tortenoye⁽ⁱ⁾, maneuvre, et cinq autres maneuvres avecques luy, pour chacun troys journees par eulx mises et emploiees a dresser ledit mast oudit carroué et aider a faire le parc et mectre les pousteaux [f° 3 v°] sur lesquelz estoient lesditz porc espy et hermyne, a esté paié par ledit Moreau la somme de XXX solz tournois, qui est au pris de XX d. a chacun d’eulx par jour. Pource XXX s.

A Gillet Flory, notonnier, pour six journees par luy mises et emploiees a aider a atacher et tendre les cordes audit mast pour faire ledit pavillon, ou a ce faire luy a convenu a estre halé en une courbaille au fest dudit mast ou il luy convenoit estre tout le jour, au pris de III s. IIII d. par jour, a esté paié par ledit Moreau comme appert par quictance la somme de XX s.
Par quictance

A Colin Godeau, six semblables journees mises et emploiees aux choses dessusdites, au pris de II s. VI d. par jour, a esté paié comme appert par quictance. Pource XV s.
Par quictance

A Pierre de la Barre, notonnier, pour six autres semblables journees par luy mises et emploiees comme dessus a besoigner audit pavillon, audit pris de II s. VI d. par jour, a esté paié comme appert par quictance XV s.
Par quictance

A Jehan Chaillon le jeune^(j), aussi notonnier, pour autres six journees par luy mises et emploiees avecques les dessusditz pour besoigner audit pavillon, audit pris de II s. VI d. tournois par jour, a esté paié XV s.

[f° 4] A Jehan Billault, de Lisle, pour avoir fourny de la plus grant part du cordaige et mesmement de grosses cordes a tendre ledit pavillon, a esté paié par ledit Moreau pour le dechect dicelles la somme de XXV s.

A Huguet Vincent, pour avoir fourny d’aucune porcion dudit cordaige mis audit pavillon, a esté paié pour le dechect dicelles la somme de V s.

A Jehan Mercier, cordier, pour avoir fourny semblement de plusieurs cordes pour les causes que dessus, a esté paié pour le dechect dicelles la somme de XXV s.

a. ou Aucheron. – b. ou Lointier. – c. ou Gouellard, Govellard. – d. ou Daviau. – e. ou Gouellard, Govellard. – f. ou Birou. – g. ou saugeant. – h. ou Hamart. – i. ou Tortevoye. – j. ou Chaillou.