[f° 28] A Mathurin Prunelle, menusier, XI l. XV s. tournoys a la quelle somme a esté finé^(a) et appoincté avecques luy, tant pour avoir fourny de deux cens ayes de sapin par luy baillez pour faire les chaffaulx sur lesquelz, la nuyt de Noel l’an de ce compte, fut joué davant le roy la Nativite de Notre Seigneur, et aidé a faire ledit chaffaulx, que pour la perte qui s’est trouvee parce que la pluspart et jusques a ung cent ou environ ont esté desrober, et les autres fenduz et gastez des cloux qui y furent mis a faire lesdit chaffaulx. Comme appert par mandement et quictance cy rendus. Pource XI l. XV s.
Par mandement et quictance.

A Jehan Rougemont le jeune, marchant drappier VI l. VII s. VI d. pour troys aulnes taffetas bleu par luy baillé et livré a Noel l’an de ce compte a celuy qui joua le personnaige de Notre Dame au jeu de la Nativite Notre Seigneur et qui fut jouee ou chastel dudit Amboise [f° 28 v°] la nuyt de Noel, davant le roy notre sire et par son commandement, qui est au pris de XLII s. VI d. l’aulne. Comme appert par mandement et quictance cy rendus. Pource VI l. VII s. VI d.
Par mandement et quictance^(b)

A Estienne Perrin, menusier, XVIII l. X d. tournois. Savoir est XL s. pour six dressouers de boys de seage faiz ou carroué de ladicte ville, a l’eure que le roy vint en icelle a son retour de Napples, pour mectre la vesselle d’argent et autres choses pour servir au bancquet, et choses que on faisoit pour l’entree dudit sire. Et aussi fait ung parc de boys de seage pour garer ladicte vesselle et choses a ce neccessaires. Et pour les journees par luy et ses gens mises et emploiees a ce faire. Et perte de son boys par luy baillé a faire les choses dessusdites. [f° 29] Item, X s. pour ung chasseys de boys carré pour tendre le pesle pour mectre sur le roy a sadicte entree. Item, XVII s. VI d. pour ung huys enchassillé mis en la haulte chambre du portal ou on veult mectre l’orloge de cestedicte ville. Item, VI l. pour avoir fait la menuserie d’un portal ouvrouer estant soubz ledit portal, du cousté devers la maison feu Gonellard⁽¹⁾, et autres choses a ce neccessaires. Item, III s. IIII d. tant pour avoir couppé ung quart pour faire deux jallotz que pour en relier et en foussez ung autre qui estoit despecé. Item, V s. pour avoir couvert de menuserie l’escuczon ou sont les armes du roy au port du pont sortant hors la ville. Item, LX s. tournoys pour deux tabernacles que ledit Perrin a faiz la vigille de Noel l’an de ce compte pour jouez la Nativité Notre Seigneur, pour servir l’un a Notre Dame et l’autre pour les ydolles, et pour deux grans tableaux faiz pour mectre deux grans myrouers, et pour boys et douelles, chaulme, plomb, perches que pour ses journees et vaccacions de luy et ses gens. Et aussi pour ung angin a quatre poulyes a monter et descendre les anges en Paradis et autres choses a ce neccessaires. Et C V s. tournoys pour XIIII toises de seage de hucherie par luy baillees pour couvrir les ponts leveys de ladicte ville, tant aux grans ponts que aux autres ponts d’icelle, qui est au pris de VII s. VI d. la toise. Le tout par luy fait baillé et livré par notre commandement pour les choses neccessaires [f° 29 v°] de ladicte ville en l’an de ce compte, comme appert par mandement et quictance cy rendus. Pource XVIII l. X d.
Par mandement. A ce present article seront faiz les mandemens particuliers, chacun en son endroit et par ordre, et seullement les seront faiz les articles de ce present compte, et aux despens dudit menusier.^(c)

A Anthoine Querart, Thomas Gaultier, Odin Pinaye, Jehan Bigot et Pierre Terreau, maneuvres, la somme de XII l. II s. VI d. tournoys. Savoir est audit Querart XL s. pour XVI journees, audit Gaulthier LXII s. VI d. pour XXV journees, audit Pinaye LXVII s. VI d. pour XXVII journees, audit Bigot XXXV s. pour XIIII journees et audit Terreau XXXVII s. VI d. pour XV journees. Lesdites journees au pris de II s. VI d. par jour et par eulx mises et emploiees depuis le XII^e jour de novembre jusques au dernier jour de janvier l’an de ce compte, tant pour avoir curé par plusieurs foiz la porte Titery, la porte Trippiere, la porte Saint Simon et le carroué de ladicte ville. Et aussi pour avoir porté par plusieurs foiz des planches et autres boys pour besongner aux ponts. Et semblablement pour aider a porter les ayes et boys carré ou chastel la vigille de Noel pour faire les chauffaulx sur lesquelz a esté joué la Nativité Notre Seigneur devant le roy. Et pour curer les grans ponts et autres choses neccessaires pour le fait de ladicte ville. Comme tout ce peut apparoir par mandement et quictance cy rendus. Pource XII l. II s. VI d.
Par mandement et quictance

[f° 30] A Jehan Jusqueau, appothicaire, IIII l. VIII s. II d. C’est assavoir XX s. pour une once six gros canfre. Item, XXVI s. VIII d. pour quatre livres verdet. Item, IIII s. tournoys pour six livres rouzine. Item, XII s. VI d. pour deux livres et demye eaue de vie. Item, XX s. pour quatre torches poisant chacune une livre cire, au pris de V s. tournoys la livre, et V s. pour demye livre cire rouge. Le tout par luy baillé et livré pour ladicte ville le XXI^e jour de decembre l’an de ce compte pour emploiez aux choses neccessaires a jouez le mistere de la Nativité Notre Seigneur, la nuyt de Noel dernier passé, devant le roy et la royne, comme appert par mandement et quictance cy rendus. Pource IIII l. VIII s. II d.
Par mandement et quictance

A Jehan Le Mercier, cordier, IIII l. II s. IIII d. tournoys. Savoir est XL s. pour une corde poisant quarante livres chanvre avecques ung peu de menue corde, au pris de XII d. la livre, pour servir a l’engin dont on a baptu les pichons aux grans ponts de boys de ladicte ville. Item, XV s. pour XV livres autre corde baillee a une autre foiz pour abillez lesditz ponts, audit pris de XII deniers la livre. Item, II s. II d. pour treze toises de ligne de fil d’estain pour servir aux charpentiers qui ont besoigné ausditz ponts, au pris de II deniers tournoys la toise. Item, VI deniers pour six toises de menue corde baillee pour lesditz ponts. Item, IIII s. pour huit longes par luy baillee pour servir [f° 30 v°] a chaffauder les couvreux a la tour de l’orloge. Item, V s. pour cinq livres grosse corde pour servir ausditz ponts baillee a une autreffoiz, au pris de XII deniers la livre. Item, XII d. pour deux autres longes de corde baillees pour lesditz ponts. Item, III s. pour troys livres autre cordaige, durant que le roy estoit en cestedicte ville, a abillez lesditz ponts. Item, X s. pour deux pieces de verdon par luy baillé au jour de Noel pour servir a faire les chaffaulx et autres choses a jouer la Nativité Notre Seigneur devant le roy. Item, XII d. pour demye livre ficelle. Et VIII d. pour huit brasses de fouet pour servir a ladicte Nativité. Le tout par luy baillé et livré en l’an de ce compte comme appert par mandement et quictance cy rendus. Pource IIII l. II s. IIII d.
Appoincté que le contenu en cest article de ce que est en nature fut mis es mains des esleuz dessusdits par les esleuz precedens du temps de ce compte par inventoire signé de leurs mains. Et parce passé lesdits articles par mandement et quictance.

A Laurens Chaillou, appothicaire, LXXI s. VIII d. Savoir XV s. pour deux livres dragee perlee, canelle et admendes confictes qui furent donnees on moys d’octobre l’an de ce compte quant on fist les feuz en ceste ville pour les bonnes nouvelles qui vindrent d’Angleterre. Item, XXV s. pour cinq torches de chacune une livre de cire, par luy baillees la nuyt de Noel l’an de ce compte, pour servir a jouez la Nativité Notre Seigneur qui fut jouee devant le roy et la royne. Item, VI s. VIII d. pour une livre de grosse [f° 31] bougie emploiee a ce faire. Item, V s. pour deux autres torches chacune de demye livre de cire exploictees audit mistere. Item, XXX s. pour douze autres torches prinses par les serviteurs de monseigneur la bailly dudit Amboise et Pierre Beurre pour servir comme dessus, poisant chacune demye livre de cire. Comme appert par mandement et quictance cy rendus. Pource LXXI s. VIII d.
Par mandement et quictance

[f° 31 v°] A Pierre Hardion, cloustier, VII l. IX s. III d. tournoys. Savoir est LXX s. V d. pour II^m I^c XII clouz becdane, au pris de III s. IIII d. le cent. Item, XX d. pour deux grans crochetz, au pris de X d. piece. Item, XLVI s. VIII d. pour V^c LX clouz chevilles, au pris de VIII s. IIII d. le cent. Item, XVI d. pour huit grans cloux chevilles, au pris de II d. piece. Item, VIII s. IIII d. pour V^c cloux, au pris de XX d. le cent. Item, VI s. VIII d. pour deux cens cloux palastrerez fort, au pris de III s. IIII d. le cent. Item, IX s. pour IX^c clou palastrerez simple, au pris de XII d. le cent. Item, V d. pour ung quarteron petiz crochetz. Item, XXI d. pour ung cent troys quarterons clou a troys coups, au pris de XII d. le cent. Et III s. pour quatre cens clou a plomb, au pris de IX d. le cent. Le tout par luy baillé et livré de puis la feste Notre Dame Chandeleur IIII^c IIII^xx XVI jusques au XXVI^e jour de juing ensuivant, et an de ce compte, et emploié tant a reparer le pont leveys de la porte Galaffre, les grans ponts, clouez la clouaison d’une des chambres de la maison de la ville, et aussi les ayes des chaffaulx qui ont esté faiz pour jouez la Nativité Notre Seigneur en chastel davant le roy a Noel l’an de ce compte, que pour faire les fainctes et grans myrouers et autres choses pour servir au fait de ladicte ville. Comme appert par mandement et quictance cy rendus. Pource VII l. IX s. III d.
Par mandement et quictance

[f° 32] A Guillaume Bourgeau, marchant, LXXI s. VIII d. Savoir est XL s. pour six aulnes de bougran noir par luy baillé a Anthoine Bryant, paintre, a Noel l’an de ce compte pour le fait du mistere de la Nativité Notre Seigneur qui, la nuyt dudit jour de noel, fut jouer devant le roy an chastel dudit Amboise , qui est au pris de VI s. VIII d. l’aulne. Item, VI s. VIII d. pour huit mains de pappiers par luy baillé pour servir audit mistere qui est au pris de X deniers la main. Item, XVII s. VI d. pour une toque noire baillé par ledit Bourgeau et par notre le commandement des esleuz et de la pluspart des douze de ladicte ville a Pierre Beurre quant il eut sa robbe ou sont les armes du roy et de la ville. Et VII s. VI d. pour troys grans fueillez de fer blanc pour faire les girouetz des espiz de la tour ou l’on veult faire l’orloge, qui est au pris de II s. VI d. la fueille. Comme appert par mandement et quictance cy rendus. Pource LXXI s. VIII d.

a. Participe passé peut-être mal identifié. – b. Dans la marge du f° 28. – c. Dans la marge du f° 28 v°.
1. ou Gouellard, Govellard.