[f° 338 r° ]

Le jeudi ensuivant, XXIII^e jour de juillet IIII^c LXI, en l'ostel de la ville, en la presence de Pierre Godeau, lieutenant de monseigneur le bailli de Touraine, se sont assemblez :

Les esleuz de ladicte ville ;

Jehan Ruzé, Pierre Brete, maistre Jehan Bonnart, Jehan Briçonnet l'aisné, maistre Pierre Sohier, maistre Jehan Bernard, Piret Castellain, Jehan Galocheau, Julien Beauvarlet et autres.

Lesquelz ont deliberé qu'il est besoing et necessaire pour le bien et seurté de ladicte ville que les IIII esleuz nagaires commis a icelle aient chacun ung cartier de ladite ville et des murailles, pour y aler et venir et soy donner garde a faire, faire habiller les murailles et creneaux, et faire refaire les barieres et mectre garde au chastel de Tours, et pour ce que mondit seigneur le lieutenant s’est offert de coucher et soy tenir oudit chastel, jour et nuyt, ung autre de la ville en sa compeignie qu'on y mectra et se tiendra tendis que ledit lieutenant yra a ses besoignes le jour. A esté ordonné que ledit lieutenant sera a la garde dudit chastel et Jaquet Binet en sa compeignie, qui a fait le serment, etc., qui y coucheront, et ce pendant que l'un y sera, l'autre yra a ses besoignes. Et pour la garde de la cité et depuis l'ostel monseigneur de Tours jusques a la Guierche, Pierre Blondelet et Jehan Gaudin auront la charge et de la reparacion d'iceulx; Jehan Galocheau depuis le pont jusques a la porte de Maufumier, maistre Jehan Dupuiz depuis Maufumier jusqu’au portal de la Riche, Jehan Briçonnet depuis ladite Riche jusques a Saint-Michiel de la Guierche, et a la reparacion de la muraille d'iceulx.