[f° 339 r°]
Le XXVII^e jour de juillet, l'an mil CCCC LXI, en l'ostel de ladicte ville, en la presence de honnorables hommes Baudet Berthelot, juge de Touraine, et Pierre Godeau, lieutenant a Tours, maistre Regné Dreux, procureur du roy, et maistre Jehan De Argouges, advocat dudit seigneur ou bailliage de Touraine, se sont assemblez :

Les esleuz et le commis pour les gens d'Eglise de ladicte ville ;

maistre Pierre Le Roy, vicaire de monseigneur de Tours, et soy representant pour ledit monseigneur de Tours ;

ledit maistre Pierre Le Roy et maistre Jehan Panin, chanoines de l'eglise de Tours, et eulx representans pour le chapictre de ladicte eglise ;

maistre André Dubeuf, chanoine de l'eglise monseigneur saint Martin de Tours, et soy representant pour chapictre de ladicte eglise ;

Pierre Brete, Jehan Ruzé, Jehan Briçonnet l'aisné, maistre Jehan Bonnart, François Bernard et Jehan Bernard et Jehan Dupuiz, Piret Castellain, Geuffroy Travers, Pierre Laillier, Jullien Beauvarlet et Jehan Galocheau, et plusieurs autres;

Pour deliberer se on doit envoyer devers le roy monseigneur le Daulphin qui a present est roy, et avisez quelz gens on y doit envoyer, et iceulx eslire qui yront aux despens de ladicte ville pour lui faire l'obeissance des gens de ladicte ville et du chastel de ladicte ville et remonstrer comme on est prest de faire et acomplir ses plaisirs comme ses vraiz et obeissans subgetz.

Sur quoy a esté deliberé une au regard de aler devers le roy ont esleu pour l’eglise monseigneur saint Gacien monseigneur le chantre ou monseigneur le penitancier l'un d'eulx, pour Saint-Martin ont esleu monseigneur le tresorier de Saint-Hilaire ou monseigneur de Courçay, l'un d'eulx. Pour officiers du roy, messeigneurs les procureur et advocat du roy et maistre Jehan Benard, deux des trois bourgeois, Jehan Ruzé, Jehan Briçonnet ou Pierre Brete, deux des trois, qui yront aux despens de ladicte ville qui porteront lettres et instructions ; et a une autre assemblee en sera parachevé a deliberer.